నువ్వెవరో తెలుసుకో !

డా.మహ్మద్ హసేన :

నేను ఎవరిని? నేను ఏమిటి? అనే ప్రశ్న చాలా సులభంగా అనిపించినా, దానికి సమాధానం చెప్పడం అంత సులభం కాదు. పేరు, వృత్తి, హోదా, సామాజిక స్థానం ఇవన్నీ మన గురించి కొంత చెబుతాయి. కానీ మన ఆలోచనలు(Thoughts), అలవాట్లు, బలాలు, బలహీనతలు, ఆశలు, భయా లు, భావోద్వేగాలు, సంబంధాలు, విలువలు ఇవన్నీ కలిసి మన వ్యక్తిత్వాన్ని తయారుచేస్తాయి. మనలోని ఈ ప్రపంచాన్ని మనకే పరిచయం చేసే ప్రయత్నమే డా. మహమ్మద్ హసేన(Mohammad Hasena) రాసిన ‘మిమ్మల్ని మీరు తెలుసుకోండి వ్యక్తి త్వ వికాసం’.

ఈ పుస్తకం వ్యక్తిత్వ వికాసాన్ని ఒకే సిద్ధాంతం చుట్టూ వివరించదు. కథ లు, జీవిత సంఘటనలు, చారిత్రక ఉదాహరణలు, సూక్తులు, నీతికథలు, సామాజిక పరిశీలనలు(Social Observations)& ఇలా రకరకాల అంశాలను కలుపుకుంటూ రచయిత తన ఆలోచనలను చెబుతారు. అందుకే పుస్తకాన్ని చదువుతున్నప్పుడు ఒక పాఠ్యగ్రంథాన్ని చదువుతున్న భావన కంటే, రచయిత మనతో కూర్చుని తన అనుభవాలు, ఆలోచన లు పంచుకుంటున్నట్టుగా అనిపిస్తుంది.

మన వ్యక్తిత్వం పుట్టుకతోనే పూర్తిగా నిర్ణయించబడిపోదని రచయిత చెబుతారు. కుటుంబం, తల్లిదండ్రు లు, పెంపకం, విద్య, స్నేహాలు, పరిసరాలు, జీవితంలో ఎదురయ్యే అనుభవాలు మనల్ని ప్రభావితం చేస్తా యి. అయితే అవే మన భవిష్యత్తును నిర్ణయించాల్సిన అవసరం లేదని ఆయన గుర్తుచేస్తారు. మనం ఎలా ఆలోచించాలి, ఎలా స్పందించాలి, ఏ అలవాట్లు పెం చుకోవాలి అనే విషయాల్లో మనకూ కొంత ‘స్వేచ్ఛ’ ఉందనే నమ్మకాన్ని పుస్తకం కలిగిస్తుంది. ఈ క్రమంలో సోక్రటీస్ నేను ఎవరిని? అనే ప్రశ్నను ముందుకు తెచ్చి, మార్పు బయట నుంచి కాకుండా మనలో నుంచే మొదలవ్వాలనే విషయాన్ని రచయిత చెబుతారు.

ఈ ఆత్మపరిశీలనకు కొనసాగింపుగానే మానసిక, భావోద్వేగ పరిపక్వత గురించి పుస్తకం మాట్లాడుతుంది. 

వయసు పెరగడం మాత్రమే పరిపక్వత కాదు. ఒక పరిస్థితిని ఎలా అర్థం చేసుకుంటాం, కోపం వచ్చినప్పుడు ఎలా స్పందిస్తాం, బాధను ఎలా స్వీకరిస్తాం, ఇతరుల మాటలకు ఎంత  ప్రభావితమవుతాం.. ఇవి కూడా మన పరిపక్వతను నిర్ణయిస్తాయి. కోపం, అసూయ వంటి భావాలను అణచివేయడం కంటే వాటిని గుర్తించి, అర్థం చేసుకుని, మన స్పందనను నియంత్రించుకోవడం అవసరమని రచయిత సూచిస్తారు. ఈ దృష్టిలో.. ‘మిమ్మల్ని మీరు తెలుసుకోండి’ శీర్షికకు అసలు అర్థం కనిపిస్తుంది.

మన ఆలోచనలు మన జీవితాన్ని ప్రభావితం చేస్తాయనే విషయాన్నీ  పలురకాల ఉదాహరణలతో చెబుతారు. విజయం వెనుక కనిపించని శ్రమ, వైఫల్యాలు, సహనం, ఎన్నో ప్రయత్నాలు ఉంటాయని చారిత్రక వ్యక్తులు, శాస్త్రవేత్తలు, విద్యార్థుల అనుభవాల ద్వారా రచయిత గుర్తుచేస్తారు. వ్యక్తిత్వం అంటే వ్యక్తిగత విజయమే కాదని పుస్తకం మరో ముఖ్యమైన విషయాన్ని చెబుతుంది. మన స్నేహాలు, సంబంధాలు, మనం ఇతరులతో మాట్లాడే తీరు, మనకు మన మీద ఉన్న గౌరవం, ఇతరులను గౌరవించే విధానం ఇవన్నీ మన వ్యక్తిత్వంలో భాగమే.  పుస్తకంలోని కొన్ని కథలు సాధారణ ప్రేరణాత్మక కథలకంటే కాస్త లోతైన ఆలోచనను కలిగిస్తాయి.  

బహుశా ఈ పుస్తకం చెప్పే అసలు విషయం.. ప్రపంచాన్ని చదివే ముందు, మనల్ని మనమే చదువుకోవాలి. ఎందుకంటే మన జీవితాన్ని మార్చే మొదటి పేజీ మనలోనే ఉంటుంది.

 ----- గాజోజి శ్రీనివాస్ 9948483560.