ఇల్లు కట్టుకోవాలంటే.. పంచాయతీ చుట్టూ తిరగాల్సిందే!
- 40 ఏళ్లుగా ఉంటున్నా.. కొత్త ఇంటికి రుణం కోసం పంచాయతీ చుట్టూ ప్రదక్షిణలు
- గ్రామకంఠం స్థలాన్ని ప్రభుత్వ భూమిగా ఎలా చెబుతారంటున్న బాధితుడు
కొల్చారం, సెప్టెంబరు 23: 40 ఏళ్లుగా అక్కడే నివాసం ఉంటున్న గిరిజన కుటుంబానికి కొత్త ఇంటి నిర్మాణం(House Construction) కోసం బ్యాంకు రుణం(Bank loan) తీసుకోవాలంటే పంచాయతీ ఎన్ఓసీ(Panchayat NOC) తప్పనిసరి కావడంతో ఇబ్బందులు ఎదురవుతున్నాయి. ఎన్ఓసీ కోసం గత మూడు నెలలుగా పంచాయతీ కార్యాలయం(Panchayat Office) చుట్టూ తిరుగుతున్నా పట్టించుకోవడం లేదని ఎనగండ్ల గ్రామానికి చెందిన లంబాడి కుమార్ ఆరోపించారు.
ఎనగండ్ల గ్రామపంచాయతీ పరిధిలోని తండాలో 1980లో సుమారు 20 గిరిజన కుటుంబాలకు ప్రభుత్వం రెండెకరాల స్థలం కేటాయించి, ఇందిరమ్మ ఇళ్ల పథకం కింద ఇళ్లు నిర్మించి ఇచ్చినట్లు కుమార్ తెలిపారు. ప్రభుత్వం కేటాయించిన స్థలం అప్పట్లోనే గ్రామకంఠంగా మార్చబడిందని, అప్పటి నుంచి గిరిజన కుటుంబాలు అక్కడే నివాసం ఉంటున్నాయని పేర్కొన్నారు. ప్రతి సంవత్సరం ఇంటి పన్నులు చెల్లిస్తున్నామని తెలిపారు.
తన తండ్రి ధనరాజ్ పేరుతో ఉన్న స్థలంలో పాత ఇల్లు శిథిలావస్థకు చేరి కూలిపోవడంతో కొత్త ఇంటిని నిర్మించేందుకు ప్రైవేటు బ్యాంకు రుణం కోసం వెళ్లినట్లు కుమార్ చెప్పారు. అయితే పంచాయతీ నుంచి ఎన్ఓసీ తీసుకురావాలని బ్యాంకు సిబ్బంది సూచించారని తెలిపారు. దీంతో మూడు నెలలుగా పంచాయతీ కార్యదర్శిని సంప్రదిస్తున్నా ఎన్ఓసీ ఇవ్వడం లేదని ఆరోపించారు.
తీర్మానం లేకుండా ఎన్ఓసీ ఇవ్వం
పంచాయతీ పాలకవర్గం తీర్మానం చేసిన తర్వాతే ఎన్ఓసీ ఇస్తామని కార్యదర్శి చెబుతున్నారని కుమార్ పేర్కొన్నారు. ఈ వ్యవహారం వెనుక స్థానిక సర్పంచ్ కొరబోయిన లక్ష్మి భర్త పెంటయ్య అడ్డంకులు సృష్టిస్తున్నారని ఆయన ఆరోపించారు. అయితే ఈ ఆరోపణలపై సంబంధిత వ్యక్తుల వివరణ తెలియాల్సి ఉంది.
గ్రామకంఠం.. ప్రభుత్వ భూమి ఎలా?
నాలుగు దశాబ్దాలుగా తమ కుటుంబాలు నివసిస్తున్న స్థలాన్ని ఇప్పుడు ప్రభుత్వ భూమిగా పేర్కొనడం ఎంతవరకు సమంజసమని కుమార్ ప్రశ్నించారు. ప్రభుత్వం ఇల్లు నిర్మించి ఇచ్చినప్పటి నుంచి అక్కడే నివసిస్తూ పన్నులు చెల్లిస్తున్నామని, పాత ఇల్లు కూలిపోవడంతో కొత్త ఇంటి నిర్మాణానికి రుణం తీసుకునేందుకు కూడా ఎన్ఓసీ కోసం ఇబ్బందులు పడాల్సి వస్తోందని ఆవేదన వ్యక్తం చేశారు.
తీర్మానం చేసిన తర్వాతే ఎన్ఓసీ జారీ చేస్తాం
దుంపలకుంటలోని సర్వే నంబర్ 331లో ప్రభుత్వ భూమి ఉందని తెలిపారు. నూతన పాలకవర్గం బాధ్యతలు చేపట్టినప్పటి నుంచి ఎవరికీ అనుమతులు ఇవ్వలేదని చెప్పారు. గ్రామపంచాయతీ తీర్మానం చేసిన తర్వాతే ఎన్ఓసీ జారీ చేస్తామని స్పష్టం చేశారు.
పంచాయతీ కార్యదర్శి రాజాగౌడ్
