హైదరాబాద్: ఫోన్ ట్యాపింగ్ కేసుకు సంబంధించి తెలంగాణ హైకోర్టులో ఇటీవల జరిగిన విచారణలో ఈ విషయంలో అన్ని పార్టీలు సంయమనం పాటించాలని కోర్టు సూచించింది. న్యాయమూర్తులు, వారి కుటుంబ సభ్యుల పేర్లు, ఫోన్ నంబర్లు, ఫోటోలను బహిర్గతం చేయకుండా వ్యక్తిగత జీవితాల్లోకి ప్రవేశించకూడదని కోర్టు నొక్కి చెప్పింది. ఫోన్ ట్యాపింగ్ కేసులో ఇరుపక్షాల వాదనలు విన్న తర్వాత తదుపరి విచారణను ఈ నెల 23కి వాయిదా వేసింది. ఈ సున్నితమైన కేసుపై హైకోర్టు చాలా జాగ్రత్తగా వ్యవహరిస్తున్నట్లు తెలిపింది. ఫోన్ ట్యాపింగ్ కేసు వార్తలు రాసేటప్పుడు మీడియా జాగ్రత్తగా ఉండాలని హైకోర్టు సూచించింది. ఫోన్ ట్యాపింగ్ కేసులో  ఇప్పటికే ప్రతివాదులు కౌంటర్ దాఖలు చేశారు. అందుకు ప్రస్తుతానికి ఎలాంటి ఆదేశాలు ఇవ్వాలనుకోవడం లేదని తెలిపింది. ఇప్పటికే ఈ కేసులో రాష్ట్ర ప్రభుత్వం కౌంటర్ దాఖలు చేసింది. విచారణ జరుగుతోందని, నిందితులను అరెస్టు చేశామని ప్రభుత్వం తెలిపింది. పలువురు పోలీసు అధికారుల ఫోన్లు సైతం ట్యాపింగ్ చేసినట్లు ప్రభుత్వం దాఖాలు చేసిన కౌంటర్ లో పేర్కొంది.