Breaking News

రేవంత్, రాహుల్‌పై బండి సంజయ్ సెటైర్లు • 15 ఏళ్లకే ప్రపంచ రికార్డు • ఫోన్ ట్యాపింగ్‌లో బిగ్ బాంబ్.. రేవంత్ హింట్ • స్టాక్ మార్కెట్‌కు FII బూస్ట్ • భక్తుడి కళ్లజోడులో రహస్యం • వలపు వలలో మాజీ సైనికుడు • టీమిండియాలో కీలక మార్పులు • అండాల దందాలో మరో ఐదు కేసులు.. హైదరాబాద్‌లో కలకలం! • అయ్యప్ప దీక్షలో ఎమ్మెల్యే రాజగోపాల్‌రెడ్డి • చలి చంపుతుంది •

Districts - Kumarambheem Asifabad

పాఠశాలల పరిసరాల్లో మత్తు పదార్థాల విక్రయాలపై పోలీసుల దాడులు

ఆసిఫాబాద్: పాఠశాలల పరిసరాల్లో మద్యం, గుట్కా, సిగరెట్ల అక్రమ విక్రయాలను అరికట్టేందుకు ఎస్పీ నితికా పంత్ ఆదేశాల మేరకు జిల్లా వ్యాప్తంగా పోలీసులు ప్రత్యేక తనిఖీలు నిర్వహించారు. డీఎస్పీలు బి. అశోక్, వాహిదుద్దీన్ ఆధ్వర్యంలో శనివారం 100 మీటర్ల పరిధిలోని దుకాణాలను తనిఖీ చేసి, నిబంధనలు ఉల్లంఘించిన వారిపై 31 కేసులు నమోదు చేశారు. 3.24 లీటర్ల ఐఎంఎఫ్ఎల్ మద్యం, పొగాకు ఉత్పత్తులను స్వాధీనం చేసుకున్నారు. అక్రమ విక్రయాలపై ప్రజలు 112కు సమాచారం అందించాలని ఎస్పీ కోరారు.

14-11-2026 | 10:55pm

ఘనంగా నెహ్రూ జయంతి వేడుకలు

ఆసిఫాబాద్: జిల్లా కాంగ్రెస్ పార్టీ కార్యాలయంలో భారత తొలి ప్రధాని పండిట్ జవహర్‌లాల్ నెహ్రూ జయంతి వేడుకలను శనివారం ఘనంగా నిర్వహించారు. నెహ్రూ చిత్రపటానికి పూలమాలలు వేసి నాయకులు నివాళులర్పించారు. దేశ అభివృద్ధికి, ప్రజాస్వామ్య, లౌకిక విలువల పరిరక్షణకు నెహ్రూ చేసిన సేవలు చిరస్మరణీయమని మాజీ ఎమ్మెల్యే ఆత్రం సక్కు, మండల కాంగ్రెస్ అధ్యక్షుడు రాపర్తి మురళి, తదితరులు కొనియాడారు.

14-11-2026 | 10:37pm

జాతీయ మహాసభలను జయప్రదం చేయాలి

ఆసిఫాబాద్: ఈ నెల 15న నల్లగొండలో జరగనున్న అఖిల భారత కిసాన్ సభ 36వ జాతీయ మహాసభల ప్రదర్శన, బహిరంగ సభను విజయవంతం చేయాలని జిల్లా ఉపాధ్యక్షుడు దుర్గం దినకర్ పిలుపునిచ్చారు. రైతులు ఎదుర్కొంటున్న సమస్యల పరిష్కారం, కనీస మద్దతు ధర, సాగునీటి సౌకర్యాల కల్పన కోసం రైతాంగం ఐక్యంగా పోరాడాలని ఆయన కోరారు. ఈ కార్యక్రమంలో పలు ప్రజా సంఘాల నాయకులు పాల్గొన్నారు.

14-11-2026 | 09:52pm

జ్యుడీషియల్ ఉద్యోగుల సంఘం నూతన కార్యవర్గం ఎన్నిక

ఆసిఫాబాద్: జిల్లా కోర్టు ఆవరణలో శనివారం జిల్లా జ్యుడీషియల్ ఉద్యోగుల సంఘం నూతన కార్యవర్గ ఎన్నికలు ప్రశాంతంగా జరిగాయి. ఈ ఎన్నికల్లో వి. ప్రశాంత్ కుమార్ అధ్యక్షుడిగా, ఇ. లక్ష్మి ఉపాధ్యక్షురాలిగా, ఎస్. శ్రీదేవి ప్రధాన కార్యదర్శిగా, కె. రవీందర్ కోశాధికారిగా ఎన్నికయ్యారు. సంయుక్త కార్యదర్శులుగా ఎస్. మశ్చందర్, బి. శ్యామ్ కుమార్, ఎం. ముత్యాలు ఎన్నికైనట్లు తెలిసింది. ఎన్నికల అధికారులుగా ఎం. కొమురయ్య, ఎ. రాజగోపాల్ వ్యవహరించారు.

14-11-2026 | 09:51pm

ఆర్టీసీ బస్సు ఢీకొని తొమ్మిదేళ్ల బాలుడు మృతి

ఆసిఫాబాద్: మండలంలోని మోతుగూడ గ్రామంలో ఆర్టీసీ బస్సు ఢీకొని తొమ్మిదేళ్ల వర్షిత్ అనే బాలుడు మృతి చెందాడు. ప్రభుత్వ పాఠశాలలో నాలుగో తరగతి చదువుతున్న వర్షిత్ శనివారం పాఠశాల నుంచి ఇంటికి వచ్చి రోడ్డు దాటుతుండగా మంచిర్యాల నుంచి ఆసిఫాబాద్ వస్తున్న ఆర్టీసీ బస్సు ఢీకొట్టింది. రహదారికి ఒకవైపు లారీలు నిలిపి ఉంచడంతో డ్రైవర్‌కు బాలుడు కనిపించకపోవడమే ప్రమాదానికి కారణమని స్థానికులు తెలిపారు. ఈ ఘటనతో గ్రామంలో విషాదఛాయలు అలుముకున్నాయి.

14-11-2026 | 09:15pm

విద్యతో ఏదైనా సాధించవచ్చు

ఆసిఫాబాద్: విద్యతో జీవితంలో ఉన్నత శిఖరాలను అధిరోహించవచ్చని మాజీ అటవీశాఖ కార్పొరేషన్ చైర్మన్ అరిగెల నాగేశ్వరరావు అన్నారు. శనివారం హోలీ ట్రినిటీ పాఠశాలలో జరిగిన బాలల దినోత్సవ వేడుకల్లో ఆయన, కరస్పాండెంట్ ధవేణి మల్లేష్, ఎంఈఓ రాథోడ్ సుభాష్ పాల్గొన్నారు. ఈ సందర్భంగా చాచా నెహ్రూ సేవలను గుర్తుచేసుకున్నారు. సింగపూర్ విద్యావిధానంపై ఎంఈఓ సుభాష్ విద్యార్థులకు వివరించారు. సింగపూర్ పర్యటన ముగించుకుని వచ్చిన ఎంఈఓ సుభాష్‌ను ఘనంగా సన్మానించారు.

14-11-2026 | 08:59pm

సింగరేణి విశ్రాంత కార్మికుల సమస్యలు పరిష్కరించాలి

ఆసిఫాబాద్: సింగరేణి విశ్రాంత కార్మికుల హెల్త్ కార్డు పరిమితిని రూ.8 లక్షల నుంచి రూ.25 లక్షలకు పెంచాలని, సొంత ఇంటి నిర్మాణానికి 250 గజాల స్థలం, రూ.30 లక్షల వడ్డీ లేని రుణం మంజూరు చేయాలని జిల్లా సింగరేణి వాలంటరీ రిటైర్మెంట్ వర్కర్స్ వెల్ఫేర్ అసోసియేషన్ అధ్యక్షుడు బూడిది గోపాలకృష్ణ డిమాండ్ చేశారు. కనీస పెన్షన్ రూ.15 వేలకు పెంచాలని, కరువు భత్యం కలిపి చెల్లించాలని కోరారు. శీతాకాల పార్లమెంట్ సమావేశాల్లో డిమాండ్లను ఆమోదించకపోతే ఢిల్లీలోని జంతర్‌మంతర్ వద్ద ఆందోళన చేపడతామని హెచ్చరించారు.

14-11-2026 | 08:56pm

శిశుమందిర్‌లో ఘనంగా స్వయం పాలన దినోత్సవం

ఆసిఫాబాద్: బాలల దినోత్సవం సందర్భంగా శ్రీ సరస్వతి శిశుమందిర్‌లో శనివారం స్వయం పాలన దినోత్సవాన్ని నిర్వహించారు. ఈ కార్యక్రమంలో 30 మంది విద్యార్థులు ఆచార్యులుగా మారి నర్సరీ నుంచి తొమ్మిదో తరగతి వరకు పాఠాలు బోధించారు. తొమ్మిదో తరగతి విద్యార్థిని గుత్తి వెంకటరత్న ప్రధానాచార్యురాలిగా వ్యవహరించారు. ఉపాధ్యాయ వృత్తిలోని కష్టసుఖాలను విద్యార్థులు స్వయంగా అనుభవించి తమ అభిప్రాయాలను పంచుకున్నారని తెలిసింది.

14-11-2026 | 08:50pm

గ్రామసభ నిర్వహణపై అవగాహన

ఆసిఫాబాద్: ఆసిఫాబాద్ మండలం గుండి గ్రామంలోని ప్రభుత్వ ఉన్నత పాఠశాల ఆవరణలో సర్పంచ్ జబరి రవీందర్ అధ్యక్షతన బాలల స్నేహపూర్వక గ్రామసభ జరిగింది. బాలల హక్కులు, విద్య, ఆరోగ్యం, పోషకాహారం, భద్రత, బాల కార్మిక వ్యవస్థ నిర్మూలన, బాల్య వివాహాల నివారణ వంటి అంశాలపై చర్చించారు. పిల్లలకు నాణ్యమైన విద్య, సురక్షిత వాతావరణం కల్పించాలని ఈ సభలో పేర్కొన్నారు. ఉప సర్పంచ్ సంతోష్, వార్డు సభ్యులు, పంచాయతీ కార్యదర్శి, ఉపాధ్యాయులు, విద్యార్థులు, గ్రామస్తులు పాల్గొన్నారు.

14-11-2026 | 07:07pm

పింఛన్‌దారులకు పత్రాల పంపిణీ

వాంకిడి: మండలంలోని చౌపన్‌గూడ గ్రామ పంచాయతీలో నూతనంగా మంజూరైన చేయూత పింఛన్ల పత్రాలను సర్పంచ్ దుర్వా జైనుబాయి లబ్ధిదారులకు పంపిణీ చేశారు. ఈ పింఛన్లు వృద్ధులకు ఆర్థిక భరోసా కల్పిస్తాయని, అర్హులు సద్వినియోగం చేసుకోవాలని ఆమె సూచించారు. ఈ కార్యక్రమంలో వార్డు సభ్యులు సిడం జుగదిరావు, ఆత్రం భీంబాయి, ఆత్రం అయ్యూ, ఆత్రం లచ్చు తదితరులు పాల్గొన్నారు.

14-11-2026 | 03:51pm

అర్హులైన లబ్ధిదారులకు పెన్షన్ ప్రొసీడింగ్ పత్రాల పంపిణీ

ఆసిఫాబాద్: పట్టణంలోని జనకాపూర్ 1వ వార్డులో కౌన్సిలర్ జాడి వినోద్ కుమార్, వార్డు అధికారి అర్హులైన పెన్షన్ లబ్ధిదారులకు పెన్షన్ ప్రొసీడింగ్ పత్రాలను పంపిణీ చేశారు. ఈ సందర్భంగా లబ్ధిదారులు సంతోషం వ్యక్తం చేస్తూ కృతజ్ఞతలు తెలిపారు. ప్రభుత్వం అమలు చేస్తున్న సంక్షేమ పథకాలను అర్హులైన ప్రతి ఒక్కరికీ అందించేందుకు కృషి చేస్తోందని వారు పేర్కొన్నారు.

14-11-2026 | 03:03pm

ఘనంగా 73వ సహకార వారోత్సవాలు

ఆసిఫాబాద్: ఆసిఫాబాద్ ప్రాథమిక వ్యవసాయ సహకార సంఘం లిమిటెడ్ ఆధ్వర్యంలో 73వ సహకార వారోత్సవాలను శనివారం ఘనంగా నిర్వహించారు. సంఘం అధ్యక్షుడు అలీ బిన్ అహ్మద్ జెండాను ఆవిష్కరించారు. ఈ సందర్భంగా రైతుల సంక్షేమం, గ్రామీణ ఆర్థికాభివృద్ధిలో సహకార సంఘాల ప్రాధాన్యతను వివరించారు. ఈ కార్యక్రమంలో మున్సిపల్ చైర్మన్ ఆకాష్, వైస్ చైర్మన్ హైమద్, అడ్వకేట్స్ సంఘం అధ్యక్షుడు రాపర్తి రవి, ఇతర ప్రముఖులు, రైతులు పాల్గొన్నారు.

14-11-2026 | 02:57pm

క్రీడా పోటీల్లో సత్తా చాటిన ఎంజేపీ బాలికలు

ఆసిఫాబాద్: ఆదిలాబాద్ జిల్లా కేంద్రంలో ఇటీవల జరిగిన క్రీడా పోటీలలో ఆసిఫాబాద్ మండలం బాబాపూర్‌లోని మహాత్మా జ్యోతిబా ఫూలే గురుకుల పాఠశాల బాలికలు అద్భుత ప్రతిభ కనబరిచారు. కబడ్డీ, పరుగు పందెం, డిస్కస్ త్రో, షాట్‌పుట్, టెన్నికాయిట్, లాంగ్ జంప్ వంటి పలు విభాగాల్లో ప్రథమ, ద్వితీయ, తృతీయ స్థానాలు సాధించి ఓవరాల్ ఛాంపియన్‌షిప్‌ను కైవసం చేసుకున్నారు. విద్యార్థినుల విజయాలపై ఆర్‌సీఓ శ్రీధర్, ప్రిన్సిపాల్ రత్నాబాయి హర్షం వ్యక్తం చేశారు.

14-11-2026 | 02:54pm

32 రోజుల పోరాటానికి తాత్కాలిక విరామం

ఆసిఫాబాద్, నవంబర్ 14 (విజయ క్రాంతి): సమాన పనికి సమాన వేతనం, ఉద్యోగ భద్రత కోరుతూ 32 రోజులుగా సమ్మె చేస్తున్న ఎన్‌హెచ్‌ఎం కాంట్రాక్ట్ ఉద్యోగులు తాత్కాలికంగా ఆందోళన విరమించారు. ఐదుగురు సభ్యులతో కమిటీ ఏర్పాటు చేసి సమస్యలు పరిష్కరిస్తామని వైద్య ఆరోగ్య శాఖ కమిషనర్ హామీ ఇచ్చిన నేపథ్యంలో ఈ నిర్ణయం తీసుకున్నారు. అయితే ప్రభుత్వం నుంచి లిఖితపూర్వక హామీ ఇంకా అందలేదని జేఏసీ స్పష్టం చేసింది.

14-11-2026 | 02:20pm