Breaking News

వాట్సాప్‌లో ఆ మెసేజ్ వస్తే క్లిక్ చేయొద్దు! • కోహ్లి వరల్డ్ రికార్డు • నా వెనుక ఎవరూ లేరు • కష్టాల్లో టీమిండియా • చైనా స్పైతో ప్రేమాయణం • జగన్ కంచుకోటలో టీడీపీ జెండా! • మైలేజీకి మంగళం.. E20 కాదు.. 420 దందా! • భారత్‌కు బిగ్ షాక్.. డకౌటైన గిల్ • ఇదేం లక్కీ ఛాన్స్! నిద్రపోతే రూ.9.6 లక్షలు • దీపావళికి ముందే ఊపిరాడని పరిస్థితి •

Districts - Peddapalli

జిల్లాలో భూ పునఃసర్వేను నిర్దేశిత గడువులోగా పూర్తి చేయాలి

పెద్దపల్లి: జిల్లాలో భూముల పునఃసర్వే ప్రక్రియను వేగవంతం చేసి, నిర్దేశిత గడువులోగా పూర్తి చేయాలని అదనపు కలెక్టర్ (రెవెన్యూ) బి. శ్రీరాములు అధికారులను ఆదేశించారు. ఎక్స్‌ట్రాజెన్ రోవర్ పరికరాల వినియోగం, నిర్వహణపై క్షేత్రస్థాయి సిబ్బందికి ప్రత్యేక శిక్షణ నిర్వహించారు. ప్రభుత్వం ప్రతిష్టాత్మకంగా చేపట్టిన ఈ సర్వేను పారదర్శకంగా, పక్కాగా నిర్వహించేందుకు శిక్షణ దోహదపడుతుందని ఆయన పేర్కొన్నారు. సర్వే ఇన్‌స్పెక్టర్ సోమేశ్వర్, డిప్యూటీ తహసీల్దార్లు, సర్వేయర్లు ఈ కార్యక్రమంలో పాల్గొన్నారు.

08-11-2026 | 12:16am

రిపోర్టర్ కృష్ణ సతీమణి మృతి పట్ల మాజీ ఎమ్మెల్యే దిగ్భ్రాంతి

పెద్దపల్లి: మారేడుపల్లి సమీపంలో శనివారం జరిగిన రోడ్డు ప్రమాదంలో ఎలక్ట్రానిక్ మీడియా రిపోర్టర్ కృష్ణ సతీమణి మృతి చెందగా, కృష్ణ గాయపడి పెద్దపల్లి ప్రభుత్వ ఆసుపత్రిలో చికిత్స పొందుతున్నారు. ఈ విషయం తెలుసుకున్న రామగుండం మాజీ ఎమ్మెల్యే కోరుకంటి చందర్ ఆసుపత్రికి వెళ్లి కృష్ణను పరామర్శించారు. వైద్యులను అడిగి ఆరోగ్య పరిస్థితిని తెలుసుకున్నారు. అనంతరం మృతురాలి పార్ధివదేహానికి నివాళులర్పించి, కుటుంబ సభ్యులకు ప్రగాఢ సానుభూతి తెలిపారు.

07-11-2026 | 11:30pm

శ్రీపాద మార్గు నాలుగు వరుసల రహదారికి భూసేకరణ

మంథని: శ్రీపాద మార్గు నాలుగు వరుసల రహదారి నిర్మాణానికి అవసరమైన భూసేకరణ ప్రక్రియకు రైతులు సహకరించాలని మంథని ఆర్డీవో సురేష్ కోరారు. మంథని మండలం మల్లెపల్లి గ్రామపంచాయతీ కార్యాలయ ఆవరణలో సర్పంచ్ లక్కాకుల సత్యనారాయణ ఆధ్వర్యంలో జరిగిన గ్రామసభలో ఆయన ఈ విషయం వెల్లడించారు. అంగుళూరు ప్రాంతానికి సంబంధించిన భూసేకరణ ప్రభుత్వ నిబంధనల ప్రకారం పారదర్శకంగా జరుగుతుందని, భూములు కోల్పోయే రైతులకు న్యాయమైన పరిహారం అందజేస్తామని సురేష్ స్పష్టం చేశారు.

07-11-2026 | 11:17pm

అర్హులైన పేదలకు డబుల్ బెడ్‌రూమ్ ఇళ్లు కేటాయించాలి

కాల్వశ్రీరాంపూర్: మండల కేంద్రంలో గత ప్రభుత్వ హయాంలో నిర్మించిన 240 డబుల్ బెడ్‌రూమ్ ఇళ్లను వెంటనే అర్హులైన నిరుపేదలకు కేటాయించాలని మాజీ జెడ్పీటీసీ వంగల తిరుపతి రెడ్డి, మాజీ ఎంపీపీల ఆధ్వర్యంలో స్థానిక తహసీల్దార్‌కు వినతిపత్రం అందజేశారు. పెద్దపల్లి మాజీ ఎమ్మెల్యే దాసరి మనోహర్ రెడ్డి చొరవతో నిర్మించిన ఈ ఇళ్లను పారదర్శకంగా పంపిణీ చేయాలని వారు డిమాండ్ చేశారు.

07-11-2026 | 10:37pm

అనారోగ్య బాధితురాలికి రూ.2.50 లక్షల ఎల్‌ఓసీ మంజూరు

మంథని: అనారోగ్యంతో హైదరాబాద్‌లోని నిమ్స్ ఆసుపత్రిలో చికిత్స పొందుతున్న మంథని పట్టణానికి చెందిన కేతిరి హన్సికి రాష్ట్ర ఐటీ, పరిశ్రమలు, శాసనసభ వ్యవహారాల శాఖ మంత్రి దుద్దిళ్ల శ్రీధర్ బాబు అండగా నిలిచారు. ఆమె వైద్య చికిత్స ఖర్చుల నిమిత్తం ముఖ్యమంత్రి సహాయ నిధి (సీఎంఆర్‌ఎఫ్) ద్వారా రూ.2 లక్షల 50 వేల విలువైన లెటర్ ఆఫ్ క్రెడిట్ (ఎల్‌ఓసీ) మంజూరు చేయించారు. మంత్రి క్యాంపు కార్యాలయంలో ఎల్‌ఓసీని అందజేశారు. ఆపద సమయంలో సహాయం అందించిన మంత్రికి కుటుంబ సభ్యులు కృతజ్ఞతలు తెలిపారు.

07-11-2026 | 10:17pm

వరుసగా మూడోసారి ఫైవ్‌స్టార్ రేటింగ్‌ సాధించిన ఆర్జీ-3 ఓసీపీ-1

రామగిరి: సింగరేణి ఆర్జీ-3 ఏరియా ఓపెన్ కాస్ట్ గని-1 వరుసగా మూడోసారి జాతీయస్థాయి ఫైవ్‌స్టార్ రేటింగ్ సాధించి రికార్డు సృష్టించిందని జీఎం మధుసూదన్ తెలిపారు. గని పనితీరు, భద్రతా ప్రమాణాలు, నిర్వహణ, పర్యావరణ పరిరక్షణ, కార్మిక సంక్షేమం వంటి 84 అంశాల్లో అత్యుత్తమ ప్రతిభ కనబరిచి ఈ గుర్తింపును దక్కించుకుంది. ఛత్తీస్‌గఢ్ రాష్ట్రం రాయ్‌పూర్‌లో కేంద్ర మంత్రి చేతుల మీదుగా జీఎం సుంకర మధుసూదన్ ఈ అవార్డును అందుకున్నారు. ఈ విజయం కార్మికుల కృషి, నైపుణ్యం, అంకితభావానికి నిదర్శనమని ఆయన అభినందించారు.

07-11-2026 | 10:12pm

జిల్లాలో ఆయుష్ పోస్టుల ప్రొవిజినల్ మెరిట్ జాబితా విడుదల

పెద్దపల్లి: జిల్లాలో జాతీయ ఆయుష్ మిషన్ కింద ఔట్‌సోర్సింగ్ పద్ధతిలో భర్తీ చేయనున్న 6 ఆయుష్ పోస్టులకు సంబంధించిన ప్రొవిజినల్ మెరిట్ జాబితాలను విడుదల చేసినట్లు జిల్లా కలెక్టర్ కోయ శ్రీహర్ష తెలిపారు. మొత్తం 149 దరఖాస్తులు అందగా, వాటిని పరిశీలించిన అనంతరం ఈ జాబితాలను ప్రకటించారు. మెరిట్ జాబితాలపై అభ్యంతరాలు ఉన్న అభ్యర్థులు నవంబర్ 9, 10, 11 తేదీల్లోగా సమర్పించాలని కలెక్టర్ స్పష్టం చేశారు.

07-11-2026 | 08:58pm

ఐపీఎస్‌ పాఠశాలలో దీపావళి వేడుకలు

సుల్తానాబాద్: పెద్దపల్లి జిల్లా సుల్తానాబాద్‌లోని ఇండియన్ పబ్లిక్ స్కూల్‌లో శనివారం ముందస్తు దీపావళి వేడుకలు ఘనంగా జరిగాయి. విద్యార్థులు సంప్రదాయ దుస్తులు ధరించి, రంగవల్లులు తీర్చిదిద్ది, దీపాలు వెలిగించి ఉత్సాహంగా పాల్గొన్నారు. పాఠశాల చైర్మన్ మాటేటి సంజీవ్ కుమార్, ప్రిన్సిపల్ మాటేటి కృష్ణప్రియ హాజరై విద్యార్థులకు శుభాకాంక్షలు తెలిపారు. దీపావళి చెడుపై మంచి సాధించిన విజయానికి ప్రతీక అని, భారతీయ సంస్కృతికి ప్రతిబింబమని వారు పేర్కొన్నారు. బాణసంచా కాల్చేటప్పుడు జాగ్రత్తలు పాటించాలని, పర్యావరణ పరిరక్షణకు ప్రాధాన్యతనివ్వాలని సూచించారు.

07-11-2026 | 08:26pm

టీపీసీసీ ప్రధాన కార్యదర్శి దుద్దిళ్ల శ్రీనుబాబుకు దీపావళి శుభాకాంక్షలు

హైదరాబాద్: హైకోర్టు న్యాయవాది, మంథని మాజీ ఉపసర్పంచ్ ఇనుముల సతీష్ తన కుటుంబ సభ్యులతో కలిసి టీపీసీసీ రాష్ట్ర ప్రధాన కార్యదర్శి దుద్దిళ్ల శ్రీనుబాబును మర్యాదపూర్వకంగా కలిశారు. దీపావళి పండుగ సందర్భంగా శుభాకాంక్షలు తెలియజేసిన సతీష్, మంథని నియోజకవర్గ అభివృద్ధి కోసం నాయకులంతా ఐక్యంగా పనిచేయాలని ఆకాంక్షించారు. ఈ సమావేశంలో న్యాయవాది చందుపట్ల రమణ కుమార్ రెడ్డి కూడా పాల్గొన్నారు.

07-11-2026 | 06:13pm

ఓటరు జాబితాలో పేరు నమోదుకు మరో అవకాశం

పెద్దపల్లి: ఓటరు జాబితాలో పేరు నమోదు కాని అర్హులైన పౌరులకు ఎన్నికల సంఘం మరో అవకాశం కల్పించిందని రాష్ట్ర ప్రధాన ఎన్నికల అధికారి సి. సుదర్శన్ రెడ్డి తెలిపారు. నవంబర్ 21వ తేదీ వరకు ఎన్యుమరేషన్ ఫారాలు సమర్పించేందుకు గడువు పొడిగించినట్లు వెల్లడించారు. అర్హులైన ఏ ఒక్కరూ ఓటు హక్కు కోల్పోకుండా అధికారులు విస్తృత అవగాహన కార్యక్రమాలు నిర్వహించాలని సూచించారు. ఎస్‌ఐఆర్‌-2026 ప్రక్రియపై ఆయన జిల్లా కలెక్టర్లతో వీడియో కాన్ఫరెన్స్ నిర్వహించారు.

07-11-2026 | 06:09pm

పండుగ వేళ విషాదం

ధర్మారం, ఎండపల్లి: దీపావళి పండుగకు స్వగ్రామానికి వస్తుండగా పెద్దపల్లి జిల్లా ధర్మారం మండలం బొట్ల వనపర్తికి చెందిన ఆవుల ప్రణీత (భార్య) రోడ్డు ప్రమాదంలో మృతి చెందగా, ఆమె భర్త కృష్ణ తీవ్ర గాయాలతో ఆసుపత్రిలో చికిత్స పొందుతున్నారు. ఎండపల్లి మండలం మారేడుపల్లి శివారులో టిప్పర్ ఢీకొనడంతో ఈ ప్రమాదం జరిగింది. ఈ దంపతులకు ఇద్దరు పిల్లలు ఉన్నారు. ఈ ఘటనతో బొట్ల వనపర్తి గ్రామంలో విషాదఛాయలు అలుముకున్నాయి.

07-11-2026 | 06:06pm

కోతుల బెడదకు చెక్ పెట్టేందుకు మంథని మున్సిపాలిటీ వినూత్న చర్యలు

మంథని: మంథని పట్టణంలోని గంగాపురి ప్రాంతంలో కోతుల బెడద నివారణకు మున్సిపాలిటీ అధికారులు వినూత్న చర్యలు చేపట్టారు. ఎలుగుబంటి వేషధారణతో కోతులను తరిమే ప్రయత్నం చేశారు. గంగాపురి నాలుగో వార్డు కౌన్సిలర్ ఎరుకల స్రవంతి రమేష్ బాబు ఈ కార్యక్రమంలో పాల్గొన్నారు. ప్రజల సమస్యల పరిష్కారానికి కృషి చేస్తామని ఆమె పేర్కొన్నారు. కోతుల బెడద నుంచి శాశ్వత ఉపశమనం కల్పించాలని స్థానికులు కోరుతున్నారు.

07-11-2026 | 06:04pm

జిల్లాలో ఉపాధి హామీ పనులను వేగవంతం చేయాలి

పెద్దపల్లి: జిల్లా కలెక్టర్ కోయ శ్రీహర్ష ఓదెల మండలంలోని గోపరపల్లి, హరిపురం గ్రామాల్లో ఉపాధి హామీ పనులను పరిశీలించారు. సాగునీటి కాలువల పూడికతీత పనులను నాణ్యతతో, నిర్ణీత గడువులోగా పూర్తి చేయాలని అధికారులను ఆదేశించారు. రైతులకు మెరుగైన నీటి సరఫరా అందించాలని, గ్రామపంచాయతీ కార్యాలయాలు, మహిళా సంఘాల భవనాల నిర్మాణాలను త్వరగా పూర్తి చేయాలని సూచించారు. కూలీలకు కనీస సౌకర్యాలు కల్పించి, పనుల అమలులో పారదర్శకత పాటించాలని స్పష్టం చేశారు.

07-11-2026 | 05:59pm

కూరగాయల మార్కెట్ నిర్మాణ పనులు త్వరితగతిన పూర్తి చేయాలి

మంథని: మంథని పట్టణంలో నిర్మిస్తున్న నూతన కూరగాయల మార్కెట్ నిర్మాణ పనులను వేగవంతం చేసి త్వరితగతిన పూర్తి చేయాలని మున్సిపల్ చైర్మన్ వోడ్నాల శ్రీనివాస్, వైస్ చైర్మన్ ముసుకుల సహేందర్ రెడ్డి అధికారులను ఆదేశించారు. మార్కెట్ పనుల పురోగతిని పరిశీలించిన వారు, నాణ్యతా ప్రమాణాలు పాటిస్తూ వ్యాపారులకు, ప్రజలకు ఇబ్బందులు కలగకుండా మౌలిక సదుపాయాలు కల్పించాలని సూచించారు. పట్టణ అభివృద్ధిలో భాగంగా పనులు సకాలంలో పూర్తి చేయాలని పాలకవర్గం కృషి చేస్తోందని పేర్కొన్నారు.

06-11-2026 | 10:24pm