మృత్యుకుహరంగా మల్కారం క్వారీ
జవహర్ నగర్: మల్కాజ్‌గిరి మున్సిపల్ కార్పొరేషన్ పరిధిలోని కీసర సర్కిల్, జవహర్ నగర్ ఠాణా పరిధిలోని సర్వేనెంబర్ 12 P లో గల క్వారీలో ఆదివారం ఉదయం పిక్నిక్‌కు వెళ్లిన ఐదుగురు మిత్రులలో ఇద్దరు ప్రమాదవశాత్తు నీటిలో మునిగి మృతి చెందారు. మృతులను సయాన్ (18), రోహిత్ (18) లుగా గుర్తించారు. యాప్రాల్ ప్రాంతానికి చెందిన అక్షిత్ (19), మురారి (19), పియూష్ (18), సయాన్ (18), రోహిత్ (18) అనే ఐదుగురు మిత్రులు పిక్నిక్ కోసం వచ్చి ప్రమాదవశాత్తు నీటిలో మునిగిపోయారని జవహర్ నగర్ సర్కిల్ ఇన్స్పెక్టర్ సైదులు తెలిపారు. గల్లంతైన వారికి ఈత రాకపోవడం, ఒకరికి ఈత వచ్చినా కాలుకు గాయమవడంతో కాపాడలేకపోయారు. పోలీసులు, డిఆర్‌ఎఫ్ బృందం, ఫైర్ సిబ్బంది సహాయంతో మృతదేహాలను వెలికితీసి గాంధీ ఆసుపత్రికి తరలించారు. ఈ ఘటనపై కేసు నమోదు చేసి దర్యాప్తు చేస్తున్నారు.
01-11-2026 | 10:37pm
