Breaking News

శబరిమల భక్తుల కోసం ప్రత్యేక రైళ్లు • ఏడుకొండలవాడి దర్శనానికి భారీ క్యూ • హైదరాబాద్‌లో గ్లోబల్ సమ్మిట్ • ఇక సెలవు.. సజ్జనార్ ఎమోషనల్ పోస్ట్! • ఇటలీ సూపర్ విక్టరీ • ట్రంప్ సంచలన హెచ్చరిక • సజ్జనార్‌కు కొత్త పోస్టింగ్..21 మంది ఐపీఎస్‌ల బదిలీ! • కుర్చీల ఫ్యాక్టరీలో ఎగిసిపడిన మంటలు! • ఎన్నికల నోటిఫికేషన్ వచ్చేసింది • ‘రామాయణం’ ప్రభంజనం •

Districts - Mahabubnagar

మహిళా భవన నిర్మాణానికి శంకుస్థాపన

జడ్చర్ల: జడ్చర్ల మండలం కోడుగల్ గ్రామంలో మహిళల సౌకర్యార్థం నిర్మించనున్న మహిళా భవనానికి గ్రామ సర్పంచ్ గోదల సాయిరెడ్డి నవంబర్ 13న శంకుస్థాపన చేశారు. మహిళా సంఘాల సమావేశాలు, వివిధ కార్యక్రమాలకు ఈ భవనం ఎంతో ఉపయోగపడుతుందని సర్పంచ్ తెలిపారు. మహిళల అభివృద్ధి, గ్రామాభివృద్ధే లక్ష్యంగా ముందుకు సాగుతున్నామని ఆయన పేర్కొన్నారు. ఈ కార్యక్రమంలో పంచాయతీ కార్యదర్శి శ్రీశైలం, వార్డు సభ్యులు, మహిళా సంఘాల అధ్యక్షురాళ్లు పాల్గొన్నారు.

13-11-2026 | 08:40am

జడ్చర్ల సబ్‌రిజిస్ట్రార్‌గా చంద్రశేఖర్‌రెడ్డి నియామకం

జడ్చర్ల: జడ్చర్ల సబ్‌రిజిస్ట్రార్‌గా చంద్రశేఖర్‌రెడ్డి నియమితులయ్యారు. ప్రస్తుతం వనపర్తి సబ్‌రిజిస్ట్రార్‌గా విధులు నిర్వహిస్తున్న ఆయనను జడ్చర్లకు బదిలీ చేస్తూ జిల్లా అధికారులు ఉత్తర్వులు జారీ చేశారు. జడ్చర్లలో పనిచేస్తున్న సమయ్యను వనపర్తికి బదిలీ చేశారు. ఈ మేరకు త్వరలో చంద్రశేఖర్‌రెడ్డి జడ్చర్ల సబ్‌రిజిస్ట్రార్‌గా బాధ్యతలు స్వీకరించనున్నారు.

13-11-2026 | 08:37am

మహబూబ్‌నగర్, జడ్చర్ల జర్నలిస్టులకు అవార్డులు

జడ్చర్ల: తెలంగాణ ఉర్దూ వర్కింగ్ జర్నలిస్ట్స్ యూనియన్ (TUWJU) ఆధ్వర్యంలో హైదరాబాద్‌లోని శాంతినగర్ వెట్స్ గార్డెన్‌లో జరిగిన 10వ వార్షిక జనరల్ బాడీ సమావేశం, అవార్డుల ప్రదానోత్సవంలో మహబూబ్‌నగర్ జిల్లాకు చెందిన మున్సిఫ్ స్టాఫ్ రిపోర్టర్ రాఫె జాకీ, జడ్చర్లకు చెందిన మీర్ అర్షద్ అలీ (ANA న్యూస్) స్టేట్ బెస్ట్ జర్నలిస్ట్ అవార్డులను అందుకున్నారు. తెలంగాణ రాష్ట్ర వక్ఫ్ బోర్డు చైర్మన్ అజ్మతుల్లా హుస్సేని చేతుల మీదుగా ఈ అవార్డులు అందజేశారు. ఖాజా మొయినుద్దీన్, అబ్దుల్లా, జలీల్ రజా, బాసిత్‌లకు కూడా ప్రశంసాపత్రాలు లభించాయి.

12-11-2026 | 11:24pm

నటుడు ధ్రువ బాదిమికి ఘన సన్మానం

జడ్చర్ల: రాష్ట్ర ఫకీర్ సంక్షేమ సంఘం ఆధ్వర్యంలో ప్రముఖ నటుడు ధ్రువ బాదిమిని ఘనంగా సన్మానించారు. ‘పండుగ సాయన్న’ జీవిత చరిత్రను నాటకం రూపంలో ప్రదర్శిస్తూ బడుగు, బలహీన వర్గాల అభ్యున్నతి కోసం ఆయన చేసిన పోరాటాలు, త్యాగాలను నేటి తరానికి తెలియజేయడం అభినందనీయమని సంఘం ప్రతినిధులు కొనియాడారు. త్వరలో జడ్చర్ల నియోజకవర్గంలో కూడా ఈ నాటకాన్ని ప్రదర్శించాలని ధ్రువ బాదిమిని కోరారు.

12-11-2026 | 11:22pm

రేషన్ డీలర్లకు గౌరవ వేతనం ఇవ్వాలి

మిడ్జిల్: రాష్ట్రంలోని 17,200 మంది రేషన్ డీలర్లకు ఎన్నికల మేనిఫెస్టోలో ఇచ్చిన హామీ మేరకు నెలకు రూ.5 వేల గౌరవ వేతనంతో పాటు రూ.300 కమిషన్ పెంచాలని రేషన్ డీలర్ల సంక్షేమ సంఘం నాయకులు డిమాండ్ చేశారు. ఈ మేరకు గురువారం జడ్చర్ల ఎమ్మెల్యే జనంపల్లి అనిరుధ్ రెడ్డిని కలిసి వినతిపత్రం అందజేశారు. కాంగ్రెస్ ప్రభుత్వం ఇచ్చిన హామీని వెంటనే అమలు చేయాలని, ఈ విషయాన్ని ముఖ్యమంత్రి రేవంత్ రెడ్డి, పౌరసరఫరాల శాఖ మంత్రి ఉత్తమ్ కుమార్ రెడ్డి దృష్టికి తీసుకెళ్లి సమస్య పరిష్కారానికి కృషి చేయాలని ఎమ్మెల్యేను కోరారు. ఈ కార్యక్రమంలో సంఘం రాష్ట్ర అధ్యక్షుడు నాయకోటి రాజు తదితరులు పాల్గొన్నారు.

12-11-2026 | 11:15pm

పంట వ్యర్థాలను కాల్చొద్దు

మిడ్జిల్: మిడ్జిల్ మండల రైతులు వరి గడ్డి, జొన్న చొప్ప, మొక్కజొన్న చొప్పలను కాల్చకుండా కట్టలుగా కట్టి భద్రపరచుకోవాలని మండల పశువైద్యాధికారి సూచించారు. ఎల్‌నినో ప్రభావంతో ఏర్పడే వాతావరణ మార్పులు, కరువు పరిస్థితుల కారణంగా రానున్న ఎనిమిది నెలల పాటు పశువులకు మేత కొరత ఏర్పడే అవకాశం ఉందని పేర్కొన్నారు. పంట అవశేషాలను కాల్చడం వల్ల పర్యావరణానికి నష్టం వాటిల్లుతుందని, విలువైన మేతను కోల్పోతామని తెలిపారు. రైతులు ఈ సూచనలు పాటించి పాడి పశువులను మేత కొరత నుంచి కాపాడుకోవాలని మహబూబ్‌నగర్ జిల్లా పశువైద్యాధికారి కోరారు.

12-11-2026 | 11:00pm

వస్పులలో కాంగ్రెస్‌కు జోష్

మిడ్జిల్: మిడ్జిల్ మండలం వస్పుల గ్రామంలో బీఆర్ఎస్ పార్టీకి చెందిన సీనియర్ నాయకులు గొరిగే సత్యం, గొరిగే శ్రీశైలం, అలాగే బీజేపీ నాయకుడు బొడ్డు శీను కాంగ్రెస్ పార్టీలో చేరారు. కాంగ్రెస్ ప్రభుత్వం చేపడుతున్న అభివృద్ధి, సంక్షేమ పథకాలకు ఆకర్షితులై పార్టీలో చేరినట్లు వారు వెల్లడించారు. ఈ సందర్భంగా కాంగ్రెస్ నాయకులు వారికి పార్టీ కండువాలు కప్పి ఆహ్వానించారు. పార్టీ బలోపేతానికి కృషి చేస్తామని నూతనంగా చేరిన నాయకులు పేర్కొన్నారు.

12-11-2026 | 10:36pm

ప్రభుత్వ పాఠశాలలో ప్రీ ప్రైమరీ తరగతులు ప్రారంభం

మిడ్జిల్: మిడ్జిల్ మండల కేంద్రంలోని ప్రాథమిక పాఠశాలలో ఎంఈఓ వెంకట్రాములు, గ్రామ సర్పంచ్ ఎడ్ల శంకర్ గురువారం ప్రీ ప్రైమరీ తరగతులను ప్రారంభించారు. చిన్న వయసు నుంచే విద్యార్థులకు ప్రాథమిక నైపుణ్యాలు నేర్పేందుకు ఈ తరగతులు ఉపయోగపడతాయని వారు పేర్కొన్నారు. తల్లిదండ్రులు తమ పిల్లలను ప్రభుత్వ పాఠశాలల్లో చేర్పించి నాణ్యమైన విద్యను అందించాలని సూచించారు. ఈ కార్యక్రమంలో మండల కాంగ్రెస్ అధ్యక్షుడు గౌస్, అల్వాల్ రెడ్డి తదితరులు పాల్గొన్నారు.

12-11-2026 | 10:30pm

వేసవి నీటి ఎద్దడి నివారణకు ముందస్తు చర్యలు

జడ్చర్ల: రానున్న వేసవిలో నీటి ఎద్దడిని నివారించేందుకు జడ్చర్ల మున్సిపాలిటీ అధికారులు ముందస్తు చర్యలు చేపట్టారు. ఇందులో భాగంగా 18వ వార్డులోని శ్రీ చెన్నకేశవ స్వామి దేవాలయం సమీపంలో బోరుబావి ఫ్లషింగ్ పనులు ప్రారంభించారు. త్వరలో మోటారు ఏర్పాటు చేసి దేవాలయ భక్తులకు, పరిసర ప్రాంత ప్రజలకు తాగునీటి సౌకర్యం కల్పించనున్నట్లు మున్సిపాలిటీ అధికారులు వెల్లడించారు.

12-11-2026 | 10:10pm

వస్పులలో ఇందిరమ్మ ఇళ్ల ప్రారంభం

మిడ్జిల్: మిడ్జిల్ మండలం వస్పుల గ్రామంలో జడ్చర్ల ఎమ్మెల్యే జనంపల్లి అనిరుధ్ రెడ్డి నూతనంగా నిర్మించిన ఇందిరమ్మ ఇళ్లను ప్రారంభించారు. ఈ సందర్భంగా లబ్ధిదారులకు నూతన స్మార్ట్ రేషన్ కార్డులను పంపిణీ చేశారు. అర్హులైన పేదలకు సొంతింటి కలను సాకారం చేయడమే ప్రభుత్వ ప్రధాన లక్ష్యమని ఎమ్మెల్యే పేర్కొన్నారు. ప్రభుత్వ సంక్షేమ పథకాలను అర్హులైన ప్రతి ఒక్కరికీ అందించేందుకు కృషి చేస్తోందని వెల్లడించారు.

12-11-2026 | 09:48pm

ఆర్ధిక సమ్మిళిత సేవల సంపూర్ణత ప్రచారం

భూత్పూర్: అడ్డాకల మండలం తిమ్మాయిపల్లి గ్రామంలో SBI బ్యాంక్ ఆధ్వర్యంలో ఆర్థిక సమ్మిళిత సేవల సంపూర్ణత ప్రచారం నిర్వహించారు. LDM చంద్రశేఖర్, CFL కౌన్సిలర్ M. నరేష్ మాట్లాడుతూ PMJDY ఖాతాలు, స్కాలర్‌షిప్ ఓవర్‌డ్రాఫ్ట్, PMSBY, PMJJBY, APY పథకాల నమోదు, ఆధార్ అనుసంధానం, KCC, PMFBY దరఖాస్తుల స్వీకరణ, C-KYC ID, నిద్రాణమైన ఖాతాల క్రియాశీలత, నామినీ వివరాల నవీకరణ, క్లెయిమ్ చేయని డిపాజిట్ల పరిష్కారం, సైబర్ క్రైమ్ 1930, డిజిటల్ అరెస్ట్‌లపై వివరించారు. సర్పంచ్ మాధవి, ఉప సర్పంచ్ కొండన్న, CSP అక్తర్ సుల్తానా పాల్గొన్నారు.

12-11-2026 | 08:25pm

రైతుల సంక్షేమమే లక్ష్యం

అడ్డాకుల: అడ్డాకుల ప్రాథమిక వ్యవసాయ సహకార సంఘం (PACS) నూతన చైర్మన్‌గా గంగుల విజయమోహన్ రెడ్డి బాధ్యతలు స్వీకరించారు. ఈ కార్యక్రమానికి దేవరకద్ర ఎమ్మెల్యే జి. మధుసూదన్ రెడ్డి హాజరై, నూతన పాలకవర్గానికి శుభాకాంక్షలు తెలిపారు. రైతుల సంక్షేమం, సమస్యల పరిష్కారానికి కృషి చేయాలని సూచించారు. కరువు నష్టపరిహారం, ఉపాధి హామీ కింద అదనపు పనిదినాలు, ఆరు ఎకరాల్లో మార్కెట్ యార్డు ఏర్పాటు, సన్నబియ్యం పంపిణీ కొనసాగింపుపై హామీ ఇచ్చారు. 14 మహిళా సంఘాలకు రూ.1.80 కోట్ల చెక్కులను అందజేశారు.

12-11-2026 | 08:11pm

కోర్టుకు హాజరైన కాంగ్రెస్ నేతలు

మహబూబ్‌నగర్: దివిటిపల్లి డబుల్ బెడ్‌రూమ్ ఇళ్లను అర్హులైన పేదలకు కేటాయించాలని గతంలో పోరాటం చేసినందుకు అప్పటి బీఆర్‌ఎస్ ప్రభుత్వం కాంగ్రెస్ నాయకులపై అక్రమ కేసులు పెట్టిందని నాయకులు పేర్కొన్నారు. ఈ కేసుకు సంబంధించి టీపీసీసీ ప్రధాన కార్యదర్శి వినోద్ కుమార్, ఎన్.పి. వెంకటేష్, లక్ష్మణ్ యాదవ్, రాములు యాదవ్, సాయిబాబా, అజ్మత్ అలీ, ఫక్రు ఖురేషి తదితరులు గురువారం కోర్టుకు హాజరయ్యారు.

12-11-2026 | 07:28pm

విద్యార్థులు ఆరోగ్యంపై శ్రద్ధ వహించాలి

రాజాపూర్: విద్యార్థులు ఆరోగ్యంపై ప్రత్యేక శ్రద్ధ తీసుకోవాలని ప్రధానోపాధ్యాయుడు సయ్యద్ ఇబ్రహీం అన్నారు. గురువారం పీఎం శ్రీ జిల్లా ఉన్నత పాఠశాలలో 10 నుండి 16 సంవత్సరాల వయస్సు గల 56 మంది పదవ తరగతి విద్యార్థులకు టీడీ బూస్టర్ టీకాను వేయించారు. గాయాల వల్ల ఇన్ఫెక్షన్లు, బ్యాక్టీరియా, ధనుర్వాతం నుండి రక్షణ కల్పించేందుకు ప్రభుత్వం ఈ టీకాలను సరఫరా చేసిందని వైద్య సిబ్బంది తెలిపారు.

12-11-2026 | 07:18pm