గద్దెల ప్రాంగణంలో మావోరి ట్రైబ్స్ ప్రదర్శన  

న్యూజిలాండ్ తెగ ప్రతినిధులతో కలిసి మంత్రి సీతక్క నృత్యం

ములుగు, జనవరి 26 (విజయక్రాంతి): మేడారం మహాజాతరలో న్యూజిలాండ్ మావోరి ట్రైబ్స్ సందడి చేశారు. గద్దెల ప్రాంగణంలో హాకా నృత్య ప్రదర్శన నిర్వహించారు. ఈ సందర్భంగా మావోరి తెగ ప్రతినిధులతో కలిసి మంత్రి సీతక్క నృత్యం చేసి, వారిలో ఉత్సాహం నింపారు. ప్రపంచ ప్రఖ్యాత సమ్మక్కసారలమ్మ మహాజాతర సందర్భంగా సోమవారం న్యూజిలాండ్ దేశానికి చెందిన మావోరి తెగ (మావోరి ట్రైబ్స్) ప్రతినిధులు మేడారాన్ని సందర్శించారు. ఈ సందర్భంగా మేడారం గద్దల ప్రాంగణంలో మావోరి తెగ వారి సంప్రదాయ నృత్యమైన హాకా నృత్యాన్ని వారు ప్రదర్శించారు.

హాకా నృత్యం అనేది మావోరి తెగలో యుద్ధానికి సిద్ధమయ్యే సమయంలో తమ సైనికుల్లో ఉత్సాహం నింపేందుకు, శత్రువుల్లో భయాన్ని కలిగించే విధంగా చేసే సంప్రదాయ నృత్యంగా ప్రసిద్ధి చెందింది. ఈ నృత్యంలో ముఖభావాలు, శరీర చలనలు అత్యంత ప్రభావవంతంగా ఉంటాయి. తెలంగాణ, న్యూజిలాండ్ సాంస్కృతిక మార్పిడి కార్యక్రమంలో భాగంగా పంచాయతీ రాజ్, స్త్రీశిశు సంక్షేమ శాఖ మంత్రి సీతక్క ప్రత్యేక చొరవతో మావోరి తెగ ప్రతినిధులు మేడారం మహాజాతరను సందర్శించారు. ఈ సందర్భంగా మంత్రి సీతక్క స్వయంగా న్యూజిలాండ్ కళాకారులతో కలిసి నృత్యం చేసి, వారిలో ఉత్సాహాన్ని పెంచారు.

ఆదివాసీ సంస్కృతికి సరిహద్దులు, భాషలు అడ్డుకావు 

న్యూజిలాండ్‌కు చెందిన మావోరి తెగ నృత్య ప్రదర్శన సందర్భంగా మంత్రి సీతక్క మాట్లాడుతూ, ఆదివాసీ సంస్కృతికి దేశ సరిహద్దులు, భాషలు అడ్డుకావని అన్నారు. ప్రపంచంలో ఎక్కడైనా ఆదివాసీలు అడవి, ప్రకృతి మీదే ఆధారపడి జీవనం సాగిస్తారని స్పష్టం చేశారు. ఆదివాసీ జీవన విధానం, విశ్వాసాలు ప్రపంచవ్యాప్తంగా ఒకే తత్వాన్ని ప్రతిబింబిస్తాయని ఆమె పేర్కొన్నారు. అనంతరం మావోరి తెగ ప్రతినిధులను గద్దెల వద్దకు తీసుకెళ్లి వన దేవతల దర్శనం చేయించారు. సమ్మక్క సారలమ్మ వన దేవతల వైభవం, చరిత్రను మంత్రి సీతక్క స్వయంగా వారికి వివరించారు. ఈ సందర్భంగా బంగారం, వనదేవతల ప్రసాదాన్ని అందజేసి మావోరి తెగ ప్రతినిధులను సన్మానించారు. ఈ కార్యక్రమంలో జిల్లా కలెక్టర్ దివాకర టీఎస్, ఎస్పీ సుధీర్ రామ్నాథ్ కేకన్, ఐటీడీఏ పీవో చిత్రా మిశ్రా, జిల్లా అధికారులు పాల్గొన్నారు.