జిల్లాలో పత్తి కొనుగోళ్లకు పకడ్బందీ ఏర్పాట్లు చేయాలి

51,400 ఎకరాల్లో పత్తి సాగు.. 5.14 లక్షల క్వింటాళ్ల దిగుబడి అంచనా

కౌలు రైతులకు సైతం మద్దతు ధర అందేలా చర్యలు: కలెక్టర్ కోయ శ్రీహర్ష

పెద్దపల్లి,(విజయక్రాంతి): 2026–27 ఖరీఫ్ మార్కెటింగ్ సీజన్‌లో పత్తిని కనీస మద్దతు ధరకు కొనుగోలు చేసేందుకు పకడ్బందీ ఏర్పాట్లు చేయాలని పెద్దపల్లి జిల్లా కలెక్టర్ కోయ శ్రీహర్ష(Collector Koya Sriharsha) అధికారులను ఆదేశించారు. జిల్లాలో 51,400 ఎకరాల్లో పత్తి సాగు చేయగా, సుమారు 5,14,000 క్వింటాళ్ల దిగుబడి వస్తుందని అంచనా వేసినట్లు తెలిపారు.

సోమవారం సమీకృత జిల్లా కలెక్టరేట్‌లో అదనపు కలెక్టర్ బి. రాములుతో కలిసి సంబంధిత శాఖల అధికారులు, భారత పత్తి సంస్థ ప్రతినిధులు, జిన్నింగ్ మిల్లుల యజమానులతో పత్తి కొనుగోళ్ల ఏర్పాట్లపై సమీక్ష నిర్వహించారు. అక్టోబర్ రెండో పక్షం నుంచి పత్తి మార్కెట్‌కు రావడం ప్రారంభమై, నవంబర్, డిసెంబర్ నెలల్లో అధికంగా వచ్చే అవకాశం ఉన్నందున కొనుగోలు కేంద్రాలను ముందుగానే సిద్ధం చేయాలని సూచించారు.

రైతులకు మద్దతు ధరే లక్ష్యం

మార్కెట్‌లో కనీస మద్దతు ధర కంటే తక్కువ ధర లభించినప్పుడు రైతులు నష్టపోకుండా భారత పత్తి సంస్థ ద్వారా కొనుగోళ్లు చేపట్టాలని కలెక్టర్ స్పష్టం చేశారు. పెద్దపల్లి, సుల్తానాబాద్, కమాన్‌పూర్ వ్యవసాయ మార్కెట్ కమిటీల పరిధిలో గుర్తించిన జిన్నింగ్ మిల్లుల్లో కొనుగోలు కేంద్రాలు ఏర్పాటు చేయాలని ఆదేశించారు.

రైతు వేదికల్లో వ్యవసాయ విస్తరణ అధికారులు పత్తి నాణ్యతా ప్రమాణాలు, అనుమతించిన తేమ శాతం, కనీస మద్దతు ధర, కొనుగోలు కేంద్రాల వివరాలపై అవగాహన కల్పించాలని సూచించారు. పత్తిని పూర్తిగా ఆరబెట్టి, శుభ్రంగా తీసుకురావాలని, నాసిరకం పత్తిని నాణ్యమైన పత్తిలో కలపవద్దని రైతులకు వివరించాలన్నారు.

కప్పాస్ కిసాన్ యాప్‌పై అవగాహన

కప్పాస్ కిసాన్ యాప్ ద్వారా రైతుల నమోదు, కొనుగోలు కేంద్రాల ఎంపిక, సమయ కేటాయింపు విధానంపై అవగాహన కల్పించాలని కలెక్టర్ ఆదేశించారు. జిన్నింగ్ మిల్లుల సామర్థ్యానికి అనుగుణంగా సమయ కేటాయింపులు చేపట్టాలని, పంట నమోదు వివరాల ఆధారంగా రైతులకు సమీపంలోని కొనుగోలు కేంద్రాలను కేటాయించేలా చర్యలు తీసుకోవాలన్నారు.

అధిక దిగుబడి రైతులకు న్యాయం చేయాలి

సాఫ్ట్‌వేర్‌లో నిర్దేశించిన సగటు దిగుబడి కంటే వాస్తవ దిగుబడి అధికంగా ఉన్న రైతులకు అన్యాయం జరగకుండా చూడాలని కలెక్టర్ సూచించారు. వ్యవసాయ విస్తరణ అధికారుల ద్వారా క్షేత్రస్థాయిలో సాగు విస్తీర్ణం, పంట పరిస్థితి, వాస్తవ దిగుబడిని పరిశీలించి, నిబంధనల ప్రకారం అర్హులైన రైతులకు కొనుగోలు పరిమాణాన్ని పెంచే అవకాశం కల్పించాలని తెలిపారు.

భూమి రికార్డుల సమస్యల కారణంగా కౌలు రైతులు, డిజిటల్ సంతకాలు లేని భూములను సాగు చేస్తున్న రైతులు కనీస మద్దతు ధర ప్రయోజనాలను కోల్పోకుండా చర్యలు తీసుకోవాలని ఆదేశించారు. క్షేత్రస్థాయి పరిశీలన ఆధారంగా అర్హులైన రైతుల నమోదు, ధ్రువీకరణకు అవసరమైన సదుపాయాలు కల్పించాలని సంబంధిత అధికారులకు సూచించారు.

కొనుగోలు కేంద్రాల్లో మౌలిక వసతులు కల్పించాలి

కొనుగోలు కేంద్రాల్లో తాగునీరు, మరుగుదొడ్లు, తేమ కొలిచే యంత్రాలు, ఎలక్ట్రానిక్ తూకం యంత్రాలు అందుబాటులో ఉంచాలని కలెక్టర్ ఆదేశించారు. నిరంతర విద్యుత్ సరఫరాతో పాటు అగ్నిప్రమాదాల నివారణకు తగిన భద్రతా చర్యలు చేపట్టాలన్నారు. రైతులు తమ బ్యాంకు ఖాతాలను ఆధార్‌తో అనుసంధానం చేసుకోవాలని, పత్తి విక్రయించిన అనంతరం సకాలంలో చెల్లింపులు జరిగేలా అధికారులు చర్యలు తీసుకోవాలని సూచించారు.

మధ్యవర్తులకు తక్కువ ధరకు పత్తిని విక్రయించి రైతులు నష్టపోకుండా, అర్హులైన ప్రతి రైతుకు కనీస మద్దతు ధర ప్రయోజనం అందేలా అన్ని శాఖల అధికారులు సమన్వయంతో పనిచేయాలని కలెక్టర్ కోయ శ్రీహర్ష స్పష్టం చేశారు. ఈ సమావేశంలో జిల్లా మార్కెటింగ్ అధికారి ప్రవీణ్ రెడ్డి, వ్యవసాయ అధికారులు, జిల్లా రవాణా శాఖ అధికారి శ్రీనివాస్, జిల్లా తూనికలు కొలతల అధికారి రఘువీర్ సింగ్, జిల్లా అగ్నిమాపక అధికారి అనిల్ కుమార్, మార్కెట్ కమిటీల కార్యదర్శులు, భారత పత్తి సంస్థ అధికారులు, జిన్నింగ్ మిల్లుల యజమానులు, సంబంధిత శాఖల సిబ్బంది పాల్గొన్నారు.