చరిత్రలో ఈరోజు..రెడ్‌క్రాస్ సొసైటీ ఆవిర్భావం!
ఆపదలో ఉన్నవారికి ఆపన్నహస్తం.. రక్తదానంతో ప్రాణదానం.. విపత్తుల్లో సేవే లక్ష్యంగా భారత రెడ్‌క్రాస్ సొసైటీ ఆవిర్భావం!
1920 మార్చి 20.. భారతదేశంలో మానవతా సేవలకు కొత్త అధ్యాయం ప్రారంభమైన రోజు. ఆపదలో ఉన్నవారికి అండగా నిలవడం, ప్రజల ప్రాణాలను కాపాడటం, ప్రకృతి విపత్తుల (Natural Disasters) సమయంలో బాధితులకు సహాయం అందించడమే లక్ష్యంగా భారత రెడ్‌క్రాస్ సొసైటీ (Indian Red Cross Society)కి చట్టబద్ధమైన గుర్తింపు లభించింది.
మొదటి ప్రపంచ యుద్ధ సమయంలో గాయపడిన సైనికులు, బాధితులకు సహాయం అందించేందుకు చేపట్టిన సేవా కార్యక్రమాలే భారత రెడ్‌క్రాస్ సొసైటీ ఏర్పాటుకు పునాదిగా నిలిచాయి. 1920 మార్చి 3న సర్ క్లాడ్ హిల్ భారత శాసన మండలిలో సంస్థ ఏర్పాటుకు సంబంధించిన బిల్లును ప్రవేశపెట్టారు. మార్చి 17న బిల్లు ఆమోదం పొందగా.. మార్చి 20న గవర్నర్ జనరల్ ఆమోదంతో ఇండియన్ రెడ్‌క్రాస్ సొసైటీ చట్టం (Red Cross Act) అమల్లోకి వచ్చింది.
అదే ఏడాది జూన్ 7న 50 మంది సభ్యులతో సంస్థకు అధికారికంగా రూపకల్పన చేశారు. సర్ మాల్కమ్ హేలీ తొలి మేనేజింగ్ బాడీకి ఛైర్మన్‌గా ఎన్నికయ్యారు.
నాటి నుంచి నేటి వరకు రెడ్‌క్రాస్ సేవలు నిరంతరాయంగా కొనసాగుతున్నాయి. రక్తదాన శిబిరాల నిర్వహణ (Blood Donation Camps), అత్యవసర వైద్య సహాయం, ఆరోగ్య సేవలు, ప్రకృతి విపత్తుల సమయంలో సహాయక చర్యల ద్వారా లక్షలాది మందికి సంస్థ అండగా నిలుస్తోంది.
దేశవ్యాప్తంగా విస్తరించిన శాఖల ద్వారా సేవలందిస్తున్న భారత రెడ్‌క్రాస్ సొసైటీ మానవత్వం, సేవాభావం, నిస్వార్థ సహాయానికి ప్రతీకగా నిలుస్తోంది. కష్టాల్లో ఉన్నవారికి ధైర్యం నింపుతూ.. ఆపదలో ఉన్నవారికి అండగా నిలుస్తూ.. ప్రాణాలను కాపాడటమే పరమావధిగా సాగుతున్న సంస్థ ప్రస్థానం నేటి తరానికి స్ఫూర్తిదాయకం
