ఎల్‌నినోపై ప్రభుత్వం అప్రమత్తం కావాలి: బండారు దత్తాత్రేయ
యాదగిరిగుట్ట, అక్టోబర్ 25 (విజయ క్రాంతి): ప్రసిద్ధ పుణ్యక్షేత్రమైన యాదగిరిగుట్ట శ్రీ లక్ష్మీనరసింహ స్వామివారిని హర్యానా మాజీ గవర్నర్, కేంద్ర మాజీ మంత్రి బండారు దత్తాత్రేయ ఆదివారం దర్శించుకున్నారు. ఆలయానికి విచ్చేసిన ఆయనకు అర్చకులు, అధికారులు సంప్రదాయబద్ధంగా స్వాగతం పలికారు. అనంతరం గర్భాలయంలో స్వయంభూ శ్రీ లక్ష్మీనరసింహ స్వామివారిని దర్శించుకుని ప్రత్యేక పూజలు నిర్వహించారు. దర్శనానంతరం వేద పండితులు వేదాశీర్వచనం చేశారు. దేవస్థానం కార్యనిర్వహణాధికారి భవాని శంకర్ స్వామివారి లడ్డూ ప్రసాదాన్ని అందజేశారు.
ఈ సందర్భంగా బండారు దత్తాత్రేయ మాట్లాడుతూ, ప్రజలు సుఖసంతోషాలతో జీవించాలని, దేశంలో ఎలాంటి విపత్కర పరిస్థితులు తలెత్తకూడదని స్వామివారిని ప్రార్థించినట్లు తెలిపారు.
ఎల్‌నినో (El Niño) ప్రభావంతో ప్రపంచంలోని పలు దేశాలు ప్రతికూల పరిస్థితులను ఎదుర్కొంటున్నాయని ఆయన అన్నారు. ఈ పరిణామాలపై కేంద్ర ప్రభుత్వం ముందుగానే హెచ్చరికలు జారీ చేసిందని పేర్కొన్నారు. రాష్ట్ర ప్రభుత్వం ఈ అంశాన్ని తీవ్రంగా పరిగణించి, రాజకీయాలకు అతీతంగా అఖిలపక్ష సమావేశం ఏర్పాటు చేయాలని సూచించారు. ఎల్‌నినో ప్రభావాలపై ప్రజలకు అవగాహన కల్పించాలని కోరారు.
కేంద్ర ప్రభుత్వం 356 కరువు మండలాలను ప్రకటించి, జాతీయ విపత్తు కింద నిధులు మంజూరు చేసిందని దత్తాత్రేయ తెలిపారు. రాష్ట్ర ప్రభుత్వం రాబోయే ఎనిమిది నెలలపాటు ప్రజలు అప్రమత్తంగా ఉండేలా సూచనలు చేయాలని అన్నారు. విద్యుత్ వినియోగం, నీటి సంరక్షణ, పర్యావరణ పరిరక్షణ వంటి అంశాలపై విస్తృత అవగాహన కల్పించాలని కోరారు.
ప్రజా సంక్షేమంపై దృష్టి సారించాల్సిన సమయంలో రాష్ట్ర ప్రభుత్వం రాజకీయాలకే ప్రాధాన్యమిస్తోందని బండారు దత్తాత్రేయ విమర్శించారు. ఎల్‌నినో ప్రభావాన్ని ఎదుర్కొనేందుకు ప్రభుత్వం ముందస్తు చర్యలు చేపట్టాలని సూచించారు.
ఈ కార్యక్రమంలో బీజేపీ రాష్ట్ర కౌన్సిల్ సభ్యుడు రచ్చ శ్రీనివాస్, జిల్లా నాయకుడు కాదూరి అచ్చయ్య, మండల నాయకుడు శ్రీనివాస్, పట్టణ అధ్యక్షుడు కర్రే ప్రవీణ్ తదితరులు పాల్గొన్నారు.
