పేద కుటుంబాలకు ఆర్థిక భరోసా
బూర్గంపాడు (విజయక్రాంతి): పేద కుటుంబాలకు ఆర్థిక భద్రత (Financial Security) కల్పించడమే లక్ష్యంగా ప్రభుత్వం ఇందిరమ్మ జీవిత బీమా పథకాన్ని (Indiramma Life Insurance Scheme) అమలు చేస్తోందని పినపాక ఎమ్మెల్యే, శాసనసభ ఎస్టీ సంక్షేమ కమిటీ చైర్మన్ పాయం వెంకటేశ్వర్లు తెలిపారు. బూర్గంపాడు మండలం అంజనాపురంలో నిర్వహించిన కార్యక్రమంలో ఆయన ముఖ్య అతిథిగా పాల్గొని పథకాన్ని ప్రారంభించారు.ఈ సందర్భంగా అర్హులైన లబ్ధిదారుల వివరాలను ఆన్లైన్లో నమోదు చేయించి, ప్రక్రియ పూర్తయిన వారికి బీమా పత్రాలను (Insurance Documents) అందజేశారు. కుటుంబ పెద్దను కోల్పోయినప్పుడు ఆ కుటుంబం ఆర్థిక ఇబ్బందులకు గురికాకుండా అండగా నిలవాలన్నదే ఈ పథకం ప్రధాన ఉద్దేశమని ఎమ్మెల్యే వివరించారు.
ముఖ్యమంత్రి రేవంత్ రెడ్డి నాయకత్వంలోని కాంగ్రెస్ ప్రభుత్వం సంక్షేమం, అభివృద్ధికి సమాన ప్రాధాన్యతనిస్తూ ప్రజాపాలన సాగిస్తోందన్నారు. అర్హులైన ప్రతి కుటుంబానికి పథకం ప్రయోజనం అందేలా అధికారులు చర్యలు తీసుకోవాలని సూచించారు. గ్రామస్థాయిలో ప్రజలకు అవగాహన (Awareness) కల్పించి, లబ్ధిదారుల వివరాలను ఎలాంటి పొరపాట్లు లేకుండా నమోదు చేయాలని ఆదేశించారు.ఈ కార్యక్రమంలో అదనపు కలెక్టర్ విద్యాచందన, డీపీఓ అనూష, ఎంపీడీవో జమలారెడ్డి, తహసీల్దార్ ప్రసాద్, ఏపీఓ విజయలక్ష్మి, స్థానిక సర్పంచ్ బానోత్ నరసింహ, ఉప సర్పంచ్ జయ, పంచాయతీ కార్యదర్శి పురుషోత్తం, కాంగ్రెస్ నాయకులు, కార్యకర్తలు, గ్రామ పెద్దలు, లబ్ధిదారులు పాల్గొన్నారు.