అమ్మకాల్లో సరికొత్త రికార్డు

మారుతి, టాటా, మహీంద్రా దూకుడు... అక్టోబర్‌లో 5.3 లక్షల మార్క్!

న్యూఢిల్లీ: భారత ఆటోమొబైల్ మార్కెట్‌లో పండుగల సందడి కనిపిస్తోంది. దసరా, దీపావళి కొనుగోళ్ల జోష్‌తో కార్ల విక్రయాలు సరికొత్త రికార్డులను సృష్టించాయి. ముఖ్యంగా అక్టోబర్ నెలలో దేశీయ ప్యాసింజర్ వెహికల్స్ (Passenger Vehicles) హోల్‌సేల్ అమ్మకాలు తొలిసారిగా 5 లక్షల మార్కును దాటాయి. మారుతి సుజుకి, హ్యుందాయ్, మహీంద్రా వంటి ప్రముఖ కంపెనీలు తమ చరిత్రలోనే అత్యధిక నెలవారీ విక్రయాలను నమోదు చేశాయి. పరిశ్రమ అంచనాల ప్రకారం అక్టోబర్‌లో దేశీయ మార్కెట్‌కు కార్లు, SUVలు సహా మొత్తం 5.25 లక్షల నుంచి 5.30 లక్షల వాహనాలను కంపెనీలు డీలర్లకు పంపించాయి. గత ఏడాది ఇదే నెలలో నమోదైన 4.6 లక్షల యూనిట్లతో పోలిస్తే ఈసారి అమ్మకాలు సుమారు 13 నుంచి 15 శాతం పెరిగాయి. ఇప్పటికే అధిక అమ్మకాలు నమోదైన గత ఏడాది గణాంకాలను అధిగమించడం ఆటోమొబైల్ రంగంలో ఆసక్తికర పరిణామంగా మారింది.

మారుతి నుంచి మహీంద్రా వరకు.. కంపెనీల వారీగా సేల్స్ ఇవే!

అక్టోబర్ నెలలో ప్రముఖ ఆటోమొబైల్ కంపెనీలు మంచి Performance కనబరిచాయి. మార్కెట్ లీడర్ మారుతి సుజుకి దేశీయంగా 2.12 లక్షల వాహనాలను డీలర్లకు పంపించింది. గత ఏడాదితో పోలిస్తే ఇది 20 శాతం వృద్ధి. టాటా మోటార్స్ 21 శాతం వృద్ధితో 73,894 యూనిట్లను నమోదు చేసింది. మరోవైపు మహీంద్రా అండ్ మహీంద్రా 2 శాతం వృద్ధితో 73,338 వాహనాలను విక్రయించింది. హ్యుందాయ్ మోటార్ ఇండియా దేశీయ హోల్‌సేల్ డిస్పాచ్‌లలో 16.7 శాతం వృద్ధిని సాధించి 62,799 యూనిట్లకు చేరుకుంది. ఈ కంపెనీలు పండుగల సీజన్‌లో వచ్చిన డిమాండ్‌ను అందిపుచ్చుకుని తమ Monthly Salesలో కొత్త రికార్డులు నమోదు చేశాయి.

దీపావళి, ధన్‌తేరస్ ఎఫెక్ట్.. ముందుగానే స్టాక్ పెంచుకున్న డీలర్లు!

నవంబర్ మొదటి భాగంలో ధన్‌తేరస్, దీపావళి పండుగలు ఉండటంతో అక్టోబర్‌లోనే డీలర్లు భారీగా వాహనాలను Stock చేసుకున్నారు. పండుగల సమయంలో కస్టమర్లకు వెంటనే డెలివరీలు అందించేందుకు కంపెనీల నుంచి ముందుగానే ఎక్కువ సంఖ్యలో కార్లను తెప్పించుకున్నారు. అందువల్ల అక్టోబర్‌లో నమోదైన Wholesale Sales గణాంకాలు, అదే నెలలో కస్టమర్లకు వాస్తవంగా డెలివరీ చేసిన కార్ల సంఖ్యతో సమానం కావని మార్కెట్ నిపుణులు చెబుతున్నారు. నవంబర్‌లో పండుగ డెలివరీలు ఎక్కువగా ఉండటంతో అక్టోబర్ రిజిస్ట్రేషన్లు గత ఏడాదితో పోలిస్తే తగ్గే అవకాశం ఉందని Mobility Global ప్రతినిధి గౌరవ్ వంగాల్ అభిప్రాయపడ్డారు.

GST తగ్గింపు.. కార్ల కొనుగోళ్లకు మరింత ఊతం!

గత ఏడాది సెప్టెంబర్ చివరి వారంలో GST రేట్లు తగ్గిన తర్వాత కార్ల కొనుగోళ్లపై వినియోగదారుల్లో ఆసక్తి పెరిగింది. అంతకుముందు పన్ను తగ్గింపుల కోసం కొందరు కొనుగోలుదారులు తమ నిర్ణయాలను వాయిదా వేసుకున్నారు. కొత్త రేట్లు అమల్లోకి వచ్చిన తర్వాత మార్కెట్‌లో Demand ఒక్కసారిగా పుంజుకుంది. పండుగల సీజన్‌లో ఈ ప్రభావం మరింత స్పష్టంగా కనిపించింది. తక్కువ వడ్డీ రేట్లతో Vehicle Loans తీసుకోవడం కొంత సులభం కావడం, ఆదాయపు పన్ను సంస్కరణలతో వినియోగదారుల చేతిలో ఖర్చు చేయడానికి ఎక్కువ డబ్బు మిగలడం కూడా వాహన విక్రయాలకు దోహదపడుతున్నాయి. ప్రస్తుత ఆర్థిక సంవత్సరం తొలి ఆరు నెలల్లో దేశీయ ప్యాసింజర్ వెహికల్ అమ్మకాలు 28.3 శాతం పెరిగి 20.55 లక్షల యూనిట్లకు చేరాయి. దేశీయ మార్కెట్‌తో పాటు Export విభాగంలోనూ మెరుగైన పనితీరు నమోదవుతోందని కంపెనీలు వెల్లడిస్తున్నాయి. మొత్తంగా పండుగల కొనుగోళ్లు, GST ప్రయోజనాలు, మెరుగైన కొనుగోలు సామర్థ్యం భారత కార్ల మార్కెట్‌కు కొత్త ఊపునిస్తున్నాయి.