డిసెంబర్ 13న జగిత్యాలలో మాల సభ
జగిత్యాల, నవంబర్ 22 (విజయక్రాంతి): రిజర్వేషన్ల అమలులో మాల సామాజిక వర్గానికి జరుగుతున్న అన్యాయాలు, సామాజికంగా ఎదురవుతున్న సమస్యలపై ఐక్యంగా గళమెత్తి, హక్కుల పరిరక్షణ కోసం ఉద్యమ కార్యాచరణ (Action Plan) రూపొందించాలని మాజీ మంత్రి సుద్దాల దేవయ్య పిలుపునిచ్చారు. ఈ నేపథ్యంలో డిసెంబర్ 13న జగిత్యాలలో జిల్లా స్థాయి భారీ సభ నిర్వహించాలని నిర్ణయించినట్లు వెల్లడించారు.
సభ నిర్వహణ ఏర్పాట్లపై ఆదివారం జగిత్యాల పట్టణంలోని దేవిశ్రీ గార్డెన్స్లో మాజీ మంత్రి సుద్దాల దేవయ్య ఆధ్వర్యంలో సన్నాహక సమావేశం (Preparatory Meeting) నిర్వహించారు.
ఈ సందర్భంగా రిజర్వేషన్ల అమలులో ఎదురవుతున్న సమస్యలు, విద్య, ఉద్యోగ, రాజకీయ రంగాల్లో సమాన అవకాశాలు, రాజ్యాంగబద్ధమైన హక్కుల పరిరక్షణ తదితర అంశాలపై చర్చించారు. డిసెంబర్ 13న నిర్వహించనున్న జిల్లా స్థాయి సభకు వేదిక ఖరారు, నిర్వహణ కమిటీల ఏర్పాటు, గ్రామీణ, పట్టణ ప్రాంతాల్లో ప్రచారం, వివిధ మాల సంఘాలు, ప్రజా సంఘాల నాయకులు, ఉద్యోగులు, యువత, మేధావుల భాగస్వామ్యంపై సమాలోచనలు జరిపారు. సభను విజయవంతం చేసేందుకు చేపట్టాల్సిన కార్యాచరణపై చర్చించారు.
మాల సామాజిక వర్గం ఎదుర్కొంటున్న సమస్యల పరిష్కారం, హక్కుల పరిరక్షణ కోసం సంఘాల మధ్య ఐక్యత (Unity) అవసరమని సమావేశంలో పేర్కొన్నారు. ఈ ఉద్యమ కార్యాచరణలో ప్రతి ఒక్కరూ భాగస్వాములై, డిసెంబర్ 13న నిర్వహించనున్న జిల్లా స్థాయి సభను విజయవంతం చేయాలని నిర్వాహకులు పిలుపునిచ్చారు.
ఈ సమావేశంలో గోపోజు రమేష్ బాబు, చిత్తారి ప్రభాకర్, గుడిసెల అశోక్ రాజు, నల్ల శ్యామ్, నకుమల్ల లక్ష్మీనారాయణ, పులి గోవర్ధన్, మద్దెల నారాయణ, కొప్పర్ల సత్యం, కారంగుల వసంతరావు, మ్యాకల లక్ష్మణ్, సుంకరపెళ్లి అశోక్, మ్యాదరి శ్రీహరి నరహరి తదితర అంబేద్కర్వాదులు పాల్గొన్నారు.