కార్తీక మాసం వేళ యాదాద్రికి పోటెత్తిన భక్తులు
యాదగిరిగుట్ట: యాదాద్రి శ్రీలక్ష్మీ నరసింహ స్వామి దేవస్థానంలో కార్తీక మాస ఉత్సవాలు (Karthika Masam Celebrations) వైభవంగా కొనసాగుతున్నాయి. కార్తీక మాసం, ఆదివారం సెలవు కావడంతో స్వామివారి దర్శనం కోసం భక్తులు భారీ సంఖ్యలో తరలివచ్చారు. దీంతో ఆలయ పరిసరాలు భక్తులతో కిటకిటలాడాయి.
తెల్లవారుజాము నుంచే భక్తులు ఆలయానికి చేరుకుని పుష్కరిణిలో పుణ్యస్నానాలు (Holy Bath) ఆచరించి స్వామివారిని దర్శించుకున్నారు. ప్రత్యేక పూజలు నిర్వహిస్తూ మొక్కులు చెల్లించుకున్నారు. కార్తీక మాసం సందర్భంగా ఆలయంలో సత్యనారాయణ స్వామి వ్రతాలు (Satyanarayana Vratam) పెద్ద సంఖ్యలో నిర్వహించారు.
ఆదివారం కావడంతో భక్తుల రద్దీ మరింత పెరిగింది. ఆలయానికి వచ్చే మార్గాల్లో కార్లు, ఇతర వాహనాలు బారులు తీరాయి. భక్తులకు ఎలాంటి ఇబ్బందులు కలగకుండా దేవస్థానం అధికారులు దర్శన ఏర్పాట్లు (Temple Arrangements) చేపట్టారు. కార్తీక మాస ఉత్సవాలతో యాదాద్రి క్షేత్రం ఆధ్యాత్మిక శోభను సంతరించుకుంది.