పంటలకు నీరు కరువు.. మిషన్ భగీరథ లీకేజీ బరువు

హుజురాబాద్, అక్టోబర్ 15 (విజయ క్రాంతి): ఓవైపు ఎల్‌నినో (El Niño) ప్రభావంతో వర్షాభావ పరిస్థితులు నెలకొని పంటలు ఎండిపోతుంటే.. మరోవైపు హుజురాబాద్ పట్టణంలో తాగునీరు వృథాగా పోతున్నా అధికారులు పట్టించుకోవడం లేదని బీసీ సంఘాల జేఏసీ గౌరవ అధ్యక్షుడు చందుపట్ల జనార్ధన్ ఆగ్రహం వ్యక్తం చేశారు. పట్టణంలోని పాత సూపర్ బజార్ ప్రాంతంలో మిషన్ భగీరథ (Mission Bhagiratha) నీరు వృథాగా పోతున్న ప్రదేశాన్ని గురువారం ఆయన పరిశీలించారు. ఈ సందర్భంగా జనార్ధన్ మాట్లాడుతూ.. ప్రజలకు అత్యవసరమైన తాగునీరు వృథా అవుతున్నా సంబంధిత అధికారులు స్పందించకపోవడం బాధాకరమన్నారు.

నీటి ప్రతి చుక్కను పొదుపుగా వినియోగించుకోవాల్సిన సమయంలో అధికారుల నిర్లక్ష్యం కారణంగా విలువైన నీరు వృథా అవుతోందని ఆవేదన వ్యక్తం చేశారు. తాగునీటి సమస్యలు తలెత్తకుండా చూడాల్సిన అధికారులు ఇలాంటి లీకేజీలపై తక్షణమే స్పందించాలని కోరారు.ఇప్పటికైనా మున్సిపల్ అధికారులు (Municipal Officials) స్పందించి నీటి వృథాను అరికట్టాలని, లీకేజీకి కారణమైన సమస్యను వెంటనే పరిష్కరించాలని జనార్ధన్ డిమాండ్ చేశారు. ప్రజలకు ఇబ్బందులు కలగకుండా తగిన చర్యలు తీసుకోవాలని సూచించారు.

ఈ కార్యక్రమంలో బీసీ జేఏసీ అధ్యక్షుడు సందేల వెంకన్న, ప్రధాన కార్యదర్శి ఇప్పకాయల సాగర్, ఉపాధ్యక్షులు మామునూరి ప్రవీణ్ కుమార్, కొలిపాక క్రాంతి కుమార్ తదితరులు పాల్గొన్నారు.