జనసేన 100% స్ట్రైక్ రేట్

04-11-2026 | 09:23am

అమరావతి: ఆంధ్రప్రదేశ్ రాజకీయాల్లో జనసేన పార్టీ(Jana Sena Party) తన విజయ పరంపరను కొనసాగిస్తోంది. సార్వత్రిక ఎన్నికల్లో సత్తా చాటిన పార్టీ, తాజాగా జరిగిన మున్సిపల్ ఎన్నికల్లోనూ(AP Municipal Elections) అదే దూకుడు ప్రదర్శించింది. కూటమి పొత్తులో భాగంగా తమకు కేటాయించిన స్థానాల్లో పోటీ చేసిన జనసేన అభ్యర్థులు విజయాలు సాధించడంతో పార్టీ 100 శాతం Strike Rate నమోదు చేసినట్లు రాజకీయ వర్గాల్లో చర్చ జరుగుతోంది.

టీడీపీ–జనసేన–బీజేపీ కూటమి Seat Sharing ఒప్పందం ప్రకారం జనసేనకు మొత్తం 4 మున్సిపల్ కార్పొరేషన్లలో మేయర్ స్థానాలు, 21 మున్సిపాలిటీలు, నగర పంచాయతీల్లో ఛైర్‌పర్సన్ స్థానాలు కేటాయించారు. వీటిలో తాజాగా 2 కార్పొరేషన్లు, 15 మున్సిపాలిటీలు, 3 నగర పంచాయతీలకు ఎన్నికలు జరిగాయి. మొత్తం 20 స్థానాల్లోనూ జనసేన అభ్యర్థులు విజయం సాధించినట్లు అందిన వివరాలు చెబుతున్నాయి. విజయవాడ, ఏలూరు కార్పొరేషన్లలోనూ జనసేన తన ప్రభావాన్ని చూపించింది. విజయవాడ మేయర్ అభ్యర్థిగా బరిలోకి దిగిన వంగవీటి రాధాకృష్ణ, ఏలూరు మేయర్ అభ్యర్థిగా పోటీ చేసిన రెడ్డి అప్పలనాయుడు విజయాలు సాధించి పార్టీకి కీలక విజయాలను అందించారు. ఈ ఫలితాలు జనసేన శ్రేణుల్లో మరింత ఉత్సాహాన్ని నింపాయి.

పిఠాపురంలో జనసేనకు భారీ మెజారిటీ

డిప్యూటీ సీఎం, జనసేన అధినేత పవన్ కల్యాణ్ ప్రాతినిధ్యం వహిస్తున్న పిఠాపురం నియోజకవర్గంలోనూ పార్టీ మంచి ఫలితాలు సాధించింది. అక్కడి రెండు మున్సిపాలిటీలను జనసేన కైవసం చేసుకున్నట్లు సమాచారం. పిఠాపురం మున్సిపల్ ఛైర్‌పర్సన్‌గా జనసేన అభ్యర్థి దానం లాజర్‌బాబు, వైసీపీ అభ్యర్థిపై 9,235 ఓట్ల భారీ మెజారిటీతో గెలుపొందారు. పిఠాపురంలోని మొత్తం 36 వార్డుల్లో మూడు స్థానాలు జనసేనకు ఏకగ్రీవమయ్యాయి. మిగిలిన వార్డుల్లో జనసేన 16, టీడీపీ 5, బీజేపీ 1, వైసీపీ 1 స్థానాలను గెలుచుకున్నాయి. మరో 10 వార్డుల్లో స్వతంత్ర అభ్యర్థులు విజయం సాధించారు. వీరిలో ఎనిమిది మంది కూటమి రెబల్స్ కావడం రాజకీయంగా ఆసక్తికరంగా మారింది. సార్వత్రిక ఎన్నికల్లో సాధించిన విజయాల తర్వాత స్థానిక సంస్థల ఎన్నికల్లోనూ జనసేన తన బలాన్ని చాటుకోవడం పార్టీ రాజకీయ ప్రాధాన్యతను మరోసారి తెరపైకి తెచ్చింది. ఈ ఫలితాలు జనసేన క్యాడర్‌లో కొత్త ఉత్సాహాన్ని నింపాయి. ఇక కూటమి ఒప్పందంలో జనసేనకు కేటాయించిన మిగిలిన రెండు కార్పొరేషన్లు, మూడు మున్సిపాలిటీలకు ఎన్నికలు జరగాల్సి ఉంది. వాటి ఫలితాలపై కూడా రాజకీయ వర్గాల్లో ఆసక్తి నెలకొంది.

జనసేన తరఫున గెలిచిన ఛైర్‌పర్సన్‌లు వీరే

రాష్ట్రంలోని వివిధ మున్సిపాలిటీలు, నగర పంచాయతీల్లో జనసేన తరఫున విజయం సాధించిన ఛైర్‌పర్సన్ అభ్యర్థుల వివరాలు ఇలా ఉన్నాయి.

- అమలాపురం – నల్లా శ్రీధర్

- పిఠాపురం – దానం లాజర్ బాబు

- తుని – శరగణం శ్రీలత

- ముమ్మిడివరం – గుబ్బల గంగా రత్నభవాని

- గొల్లప్రోలు – కడారి తమ్మయ్య నాయుడు

- సామర్లకోట – పిట్టా జానకి రామారావు

- నరసాపురం – కొత్తపల్లి శైలజ

- నిడదవోలు – మురాల జ్యోతి

- పెడన – నాగలింగ జ్యోత్స్న రాణి

- తెనాలి – తోటకూర వెంకట రమణారావు