కర్నూలు ఆస్పత్రికి రాప్తాడు నిందితుడు

అనంతపురం: రాప్తాడు పాఠశాలలో పదో తరగతి విద్యార్థినిపై చైన్‌సాతో దాడి చేసిన కేసులో నిందితుడు హేమంత్(Rapthadu Attack Accused Hemanth) ఆరోగ్య పరిస్థితి మరింత విషమించింది. ఊపిరితిత్తుల రక్తనాళాల్లో రక్తం గడ్డకట్టే Pulmonary Embolism సమస్య తలెత్తడంతో మెరుగైన చికిత్స కోసం శుక్రవారం రాత్రి అనంతపురం నుంచి కర్నూలు ప్రభుత్వ సర్వజన ఆసుపత్రి (GGH)కి తరలించారు. ప్రస్తుతం అతడి పరిస్థితి ఆందోళనకరంగా ఉందని వైద్యులు వెల్లడించారు.

గత 13 రోజులుగా రిమాండ్ ఖైదీగా అనంతపురం జీజీహెచ్‌లో చికిత్స పొందుతున్న హేమంత్‌కు నిర్వహించిన CT Scanలో ఊపిరితిత్తుల రక్తనాళాల్లో Blood Clots ఉన్నట్లు గుర్తించారు. ఈ గడ్డలు గుండె, మెదడు లేదా ఊపిరితిత్తులకు సంబంధించిన కీలక రక్తప్రసరణపై ప్రభావం చూపితే ప్రాణాపాయం ఏర్పడే అవకాశం ఉందని వైద్యులు కోర్టుకు వివరించారు. అవసరమైన అధునాతన వైద్య సదుపాయాలు, Heart-Lung Machine వంటి వసతులు అనంతపురంలో అందుబాటులో లేకపోవడంతో కర్నూలుకు తరలించాలని సూచించారు. కోర్టు అనుమతి వచ్చిన తర్వాత సుమారు 10 మంది సిబ్బందితో కూడిన భారీ Police Security మధ్య ప్రత్యేక అంబులెన్స్‌లో అతడిని తరలించారు. అంతకుముందు అధికారిక ప్రక్రియలో భాగంగా రెడ్డిపల్లి జైలుకు తీసుకెళ్లారు. ప్రస్తుతం కర్నూలు జీజీహెచ్‌లో వైద్యులు అతడికి చికిత్స అందిస్తున్నారు.

కాగా, అక్టోబర్ 31న రాప్తాడు జిల్లా పరిషత్ ఉన్నత పాఠశాలలో పదో తరగతి విద్యార్థినిపై హేమంత్ (21) ఎలక్ట్రిక్ రంపం (చైన్‌సా)తో దాడి చేసిన ఘటన రాష్ట్రవ్యాప్తంగా కలకలం రేపింది. ఈ దాడిలో విద్యార్థిని తీవ్రంగా గాయపడగా, ఆమెను రక్షించేందుకు ప్రయత్నించిన మరో విద్యార్థినికి కూడా గాయాలయ్యాయి. ప్రధాన బాధితురాలు ప్రస్తుతం బెంగళూరులోని ఆసుపత్రిలో చికిత్స పొందుతూ కోలుకుంటోంది. దాడి అనంతరం అటవీ ప్రాంతంలో తలదాచుకున్న హేమంత్‌ను పోలీసులు అరెస్ట్ చేసే సమయంలో అతడు తిరగబడటంతో కాల్పులు జరిపారు. ఈ ఘటనలో కాళ్లకు గాయాలయ్యాయి. అనంతరం Gangrene సోకడంతో వైద్యులు అతడి కుడి కాలును తొలగించారు. ఇటీవల శ్వాస తీసుకోవడంలో ఇబ్బందులు ఎదురుకావడం, బెడ్‌పై నుంచి కిందపడినట్లు సమాచారం రావడంతో అతడి ఆరోగ్య పరిస్థితిపై ఆందోళన వ్యక్తమవుతోంది.