ఎల్ నినో ఎఫెక్ట్‌.. సీతక్క కీలక ఆదేశాలు
హైదరాబాద్‌: ఎల్ నినో ప్రభావం(El Nino Impact)తో నీటి ఎద్దడి, కరువు పరిస్థితులు తలెత్తే అవకాశాలను దృష్టిలో ఉంచుకుని తెలంగాణ ప్రభుత్వం ముందస్తు చర్యలపై దృష్టి సారించింది. గ్రామీణ ప్రాంతాల్లో తాగునీటి సమస్యలు తలెత్తకుండా ఇప్పటి నుంచే అవసరమైన ఏర్పాట్లు చేయాలని మంత్రి సీతక్క(Minister Seethakka) అధికారులను ఆదేశించారు. ఈ మేరకు బీఆర్కే భవన్‌లోని ఎస్ఈఆర్పీ కార్యాలయం నుంచి సీనియర్ అధికారులతో వీడియో కాన్ఫరెన్స్ నిర్వహించారు.
12 వేల మంది ప్రజాప్రతినిధులు, అధికారులతో సమీక్ష
రాష్ట్రవ్యాప్తంగా సుమారు 12 వేల మంది సర్పంచులు, పంచాయతీ కార్యదర్శులు, సంబంధిత అధికారులతో మంత్రి మాట్లాడారు. గ్రామాల్లో కొనసాగుతున్న అభివృద్ధి పనులు, ఉపాధి హామీ పథకం (National Rural Employment Guarantee Act) పనుల పురోగతిపై వివరాలు అడిగి తెలుసుకున్నారు. రాబోయే రోజుల్లో నీటి అవసరాలను దృష్టిలో పెట్టుకుని గ్రామస్థాయిలోనే ప్రణాళికలు సిద్ధం చేసుకోవాలని సూచించారు.
నీటి సంరక్షణ పనులకు ప్రాధాన్యం
వర్షపు నీటిని సమర్థంగా ఒడిసిపట్టేందుకు వ్యవసాయ చెరువులు, ఇంకుడు గుంతలు, బోర్‌వెల్ రీఛార్జ్ పనులను వేగవంతం చేయాలని సీతక్క సూచించారు. చెక్‌డ్యామ్‌ల నిర్మాణం, చెరువుల పునరుద్ధరణ, వర్షపు నీటి సేకరణకు సంబంధించిన పనులను ప్రాధాన్య క్రమంలో చేపట్టాలని అధికారులకు స్పష్టం చేశారు.
పశువులకు నీరు, పశుగ్రాసం అందేలా చర్యలు
వేసవి లేదా వర్షాభావ పరిస్థితుల్లో పశువులకు తాగునీరు, పశుగ్రాసం కొరత ఏర్పడకుండా ముందస్తు ఏర్పాట్లు చేయాలని మంత్రి ఆదేశించారు. గ్రామాల్లో నీటి లభ్యతను ఎప్పటికప్పుడు పర్యవేక్షిస్తూ అవసరమైన చర్యలు తీసుకోవాలని సూచించారు.
గ్రామస్థాయిలోనే కార్యాచరణ సిద్ధం
నీటి సమస్య తీవ్రమయ్యే వరకు వేచి చూడకుండా ముందుగానే అవసరాలను గుర్తించి కార్యాచరణ రూపొందించాలని అధికారులకు దిశానిర్దేశం చేశారు. ఉపాధి హామీ పనులను నీటి సంరక్షణతో అనుసంధానించడం ద్వారా గ్రామీణ ప్రాంతాల్లో నీటి లభ్యతను మెరుగుపరిచేందుకు చర్యలు చేపట్టాలని సూచించారు. ఎల్ నినో ప్రభావం నేపథ్యంలో నీటి వనరుల సంరక్షణ, గ్రామీణ ఉపాధి పనుల పురోగతి, పశువుల అవసరాలపై ప్రభుత్వం దృష్టి సారించడం ప్రాధాన్యం సంతరించుకుంది.
