ట్రీటెడ్ వాటర్ వినియోగంపై కొత్త రూల్స్?

హైదరాబాద్: శుద్ధి చేసిన మురుగునీటిని సమర్థంగా వినియోగించడంపై తెలంగాణ ప్రభుత్వం దృష్టి సారించింది. ఇందులో భాగంగా ముఖ్యమంత్రి రేవంత్ రెడ్డి(CM Revanth Reddy) బుధవారం ఎంసీఆర్‌హెచ్‌ఆర్‌డీ బోధి పెవిలియన్‌లో ఎస్టీపీలు (మురుగునీటి శుద్ధి ప్లాంట్లు), ట్రీటెడ్ వాటర్ వినియోగంపై(Treated water usage) సమీక్ష నిర్వహించారు. నీటి నాణ్యత విషయంలో ఎక్కడా రాజీ పడొద్దని అధికారులకు స్పష్టం చేశారు.

ట్రీటెడ్ వాటర్ నిర్వహణలో ఏఐ వినియోగం

శుద్ధి చేసిన నీటి నాణ్యతను నిరంతరం పర్యవేక్షించేందుకు కృత్రిమ మేధస్సు (AI) సాంకేతికతను వినియోగించాలని సీఎం సూచించారు. ప్రతి శుద్ధి ప్లాంట్ వద్ద ప్రత్యేక అధికారిని నియమించాలని, ప్లాంట్ల పనితీరుపై హైడ్రా నిరంతర పర్యవేక్షణ చేపట్టాలని పేర్కొన్నారు.

ప్రభుత్వ కార్యాలయాల్లో తప్పనిసరి వినియోగం

ఓఆర్‌ఆర్ పరిధితో పాటు ఇతర ప్రాంతాల్లోని ల్యాండ్‌స్కేపింగ్, రోడ్ల శుభ్రతకు ట్రీటెడ్ వాటర్‌ను ఉపయోగించాలని రేవంత్ రెడ్డి ఆదేశించారు. సచివాలయం, సీఎంవో, ప్రభుత్వ కార్యాలయాలు, పబ్లిక్ పార్కుల్లోనూ శుద్ధి చేసిన నీటినే వినియోగించాలని స్పష్టం చేశారు. రైల్వే, మెట్రో రైలు వ్యవస్థలను కూడా ఈ విధానంలోకి తీసుకురావాలని సూచించారు.

ట్యాంకర్లకు ట్రాకింగ్.. ఫిర్యాదుల కోసం టోల్‌ఫ్రీ నంబర్

ట్రీటెడ్ వాటర్ సరఫరా చేసే ట్యాంకర్ల కదలికలను ట్రాక్ చేసే వ్యవస్థను ఏర్పాటు చేయాలని సీఎం సూచించారు. ఇందుకోసం టోల్‌ఫ్రీ నంబర్‌ను అందుబాటులోకి తీసుకురావాలని చెప్పారు. భవన నిర్మాణ అనుమతుల సమయంలోనే శుద్ధి చేసిన నీటి వినియోగానికి సంబంధించిన నిబంధనలను విధించే అంశంపై దృష్టి పెట్టాలని అధికారులకు సూచించారు.

నీటి వనరుల సమర్థ వినియోగమే లక్ష్యం

శుద్ధి చేసిన మురుగునీటిని పార్కులు, రోడ్ల శుభ్రత, ల్యాండ్‌స్కేపింగ్ వంటి అవసరాలకు వినియోగించడం ద్వారా మంచి నీటిపై ఒత్తిడిని తగ్గించే అవకాశం ఉంటుంది. నీటి నాణ్యతను కాపాడుతూ, సరఫరా వ్యవస్థను సమర్థంగా నిర్వహించడమే ఈ చర్యల్లో కీలకం. సీఎం ఆదేశాల నేపథ్యంలో సంబంధిత శాఖలు ఎలాంటి కార్యాచరణ చేపడతాయన్నది ఆసక్తికరంగా మారింది.