అర్నబ్ తుపాను ఎఫెక్ట్.. విమానాలు రద్దు
హైదరాబాద్‌: అర్నబ్ తుపాను ప్రభావం విమాన రాకపోకలపై పడింది. ప్రతికూల వాతావరణ పరిస్థితుల నేపథ్యంలో మొత్తం 33 విమాన సర్వీసులను రద్దు చేసినట్లు సమాచారం. ఇందులో శంషాబాద్‌ విమానాశ్రయం నుంచి బయలుదేరాల్సిన 17 విమానాలు ఉండగా, ఆంధ్రప్రదేశ్‌ నుంచి రావాల్సిన మరో 16 సర్వీసులు రద్దయ్యాయి.
రద్దయిన విమానాల్లో శంషాబాద్‌ నుంచి విశాఖపట్నం, విజయవాడ, రాజమహేంద్రవరం వెళ్లాల్సిన సర్వీసులు కూడా ఉన్నట్లు తెలుస్తోంది. తుపాను ప్రభావంతో ప్రయాణ షెడ్యూళ్లలో మార్పులు చోటుచేసుకోవడంతో ప్రయాణికులు ఇబ్బందులు ఎదుర్కొనే అవకాశం ఉంది.
విమానాశ్రయానికి బయలుదేరే ముందు ప్రయాణికులు తమ విమాన సర్వీసు స్థితిని సంబంధిత ఎయిర్‌లైన్ వెబ్‌సైట్ లేదా మొబైల్ యాప్‌లో తనిఖీ చేసుకోవాలి. విమానం రద్దయినా, సమయం మారినా సంబంధిత సంస్థను సంప్రదించి రీబుకింగ్ లేదా రీఫండ్ వివరాలు తెలుసుకోవాలి. తుపాను పరిస్థితులకు అనుగుణంగా విమాన సర్వీసులపై మరిన్ని మార్పులు ఉండే అవకాశం ఉన్నందున అధికారిక ప్రకటనలను గమనిస్తూ ఉండాలి.
