పూల జాతర.. పాటల హోరు

మహబూబ్‌నగర్ జిల్లా, మహమ్మదాబాద్, అక్టోబర్ 14 (విజయక్రాంతి): మండల పరిధిలోని నంచర్ల గ్రామంలో బతుకమ్మ సంబరాలు ఘనంగా నిర్వహించారు. తెలంగాణ సంస్కృతి, సంప్రదాయాలకు ప్రతీకగా నిలిచే బతుకమ్మ పండుగను మహిళలు భక్తిశ్రద్ధలతో, ఉత్సాహంగా జరుపుకున్నారు. రంగురంగుల పూలతో బతుకమ్మలను అందంగా పేర్చి, సంప్రదాయ పాటలు పాడుతూ నృత్యాలతో సందడి చేశారు. ఈ వేడుకల్లో గ్రామ సర్పంచ్ గాయత్రీ దేవి, మహిళా సమాఖ్య సభ్యులు, గ్రామ మహిళలు, గ్రామస్తులు పెద్ద సంఖ్యలో పాల్గొన్నారు. మహిళలంతా కలిసి బతుకమ్మల చుట్టూ చేరి పాటలు పాడుతూ పండుగ ఉత్సాహాన్ని పంచుకున్నారు.

తెలంగాణ ఆడపడుచుల ఆత్మీయతకు, పూల పండుగ ప్రత్యేకతకు ప్రతీకగా నిలిచే బతుకమ్మ వేడుకలు గ్రామంలో సందడి నింపాయి. సంప్రదాయాలను కాపాడుతూ మహిళలు ఉత్సాహంగా పాల్గొనడంతో గ్రామంలో పండుగ వాతావరణం నెలకొంది. ఈ వేడుకలు గ్రామ ప్రజల్లో ఆనందాన్ని నింపాయి.