సేవాభావానికి సన్మానం..ఈవో కృషికి అభినందనలు
వెంకటాపూర్ (రామప్ప), అక్టోబర్ 11 (విజయక్రాంతి): సేవాభావంతో పాటు భక్తిశ్రద్ధలు కలిగిన అధికారి రామప్ప దేవాలయ కార్యనిర్వహణ అధికారి(Executive Officer) ఇమ్మడి భాస్కర్ అని రైస్ మిల్లర్స్ అసోసియేషన్(Rice Millers Association) జిల్లా అధ్యక్షుడు బాదం ప్రవీణ్ కొనియాడారు. ఆదివారం మండలంలోని యునెస్కో(UNESCO) గుర్తింపు పొందిన రామప్ప దేవాలయాన్ని దర్శించుకున్న ఆయన, ఆలయ ఈవో ఇమ్మడి భాస్కర్‌ను కలిసి ఘనంగా సన్మానించారు.
వందల సంవత్సరాల చరిత్ర కలిగిన రామప్ప దేవాలయంలో ప్రధాన సోమసూత్ర ద్వారం సమస్యను భారత పురావస్తు శాఖ(Archaeological Survey of India) అధికారులతో సమన్వయం చేసుకుంటూ ఐదు నెలల వ్యవధిలో పరిష్కరించడం గొప్ప విషయమని ప్రవీణ్ అన్నారు. అంతేకాకుండా, దాతల సహకారంతో ఆలయంలోని పలు సమస్యలను పరిష్కరిస్తూ భక్తులకు మెరుగైన సౌకర్యాలు కల్పించేందుకు ఈవో భాస్కర్ చేస్తున్న కృషి అభినందనీయమని పేర్కొన్నారు.
విధుల పట్ల నిబద్ధతతో, ఎలాంటి అలసత్వం లేకుండా పనిచేసే వ్యక్తిత్వం భాస్కర్ సొంతమని ప్రశంసించారు. వృత్తి ధర్మాన్ని పాటిస్తూ, ఆలయ అభివృద్ధికి మరింత కృషి చేయాలనే తపన ఆయనలో కనిపిస్తోందన్నారు. రామప్ప దేవాలయంలో మరిన్ని అభివృద్ధి కార్యక్రమాలు చేపట్టి, ఉన్నతాధికారిగా మంచి పేరు సంపాదించుకోవాలని బాదం ప్రవీణ్ ఆకాంక్షించారు.
ఈ కార్యక్రమంలో ఇండియన్ రెడ్‌క్రాస్ సొసైటీ(Indian Red Cross Society) వైస్ చైర్మన్ శ్రీనివాస్, జిల్లా వైశ్య సంఘం అధ్యక్షుడు రమేష్, రెడ్‌క్రాస్ సొసైటీ కోశాధికారి సతీష్, జిల్లా రైస్ మిల్లర్స్ అసోసియేషన్ కోశాధికారి మోహన్, ఉపాధ్యక్షుడు రఘోత్తం, ములుగు యూనిట్ ఆవోపా అధ్యక్షుడు కృష్ణమూర్తి, సీనియర్ వ్యాపారవేత్తలు ప్రభాకర్, రమణయ్య తదితరులు పాల్గొన్నారు.
