న్యూఢిల్లీ: శ్రీలంకలో భారీ విధ్వంసం సృష్టించిన దిట్వా తుఫాను ఇప్పుడు భారతదేశం వైపు వేగంగా దూసుకోస్తుంది. ఈ తుఫాను ఆదివారం ఏ సమయంలోనైనా ఉత్తర తమిళనాడు, పుదుచ్చేరి, దక్షిణ ఆంధ్రప్రదేశ్ తీరాలను తాకే అవకాశమున్నట్లు భారత వాతావరణ శాఖ (IMD) తెలిపింది. ఈ ప్రాంతాలకు ఐఎండి రెడ్ అలర్ట్ జారీ చేసింది. తుఫాను భారత తీరప్రాంతానికి చేరుకుంటుండటంతో తమిళనాడు, ఆంధ్రప్రదేశ్, పుదుచ్చేరిలోని కొన్ని ప్రాంతాలను ఇప్పటికే భారీ వర్షాలు ముంచెత్తుతున్నాయి.

శనివారం మధ్యాహ్నం శ్రీలంక నుండి తుఫాను కదిలింది. అక్కడ కనీసం 153 మంది ప్రాణాలు కోల్పోగా, 191 మంది గల్లంతయ్యారు. దీని కారణంగా ద్వీప దేశం అంతటా విస్తృతమైన వరదలు, కొండచరియలు విరిగిపడ్డాయి. ప్రస్తుతం నైరుతి బంగాళాఖాతం, ఉత్తర శ్రీలంక, తమిళనాడు తీరాలకు సమీపంలో ఉన్న ప్రాంతాలను ప్రభావితం చేస్తున్న దిట్వా తుఫాను గత ఆరు గంటల్లో గంటకు 5 కి.మీ వేగంతో దాదాపు నేరుగా ఉత్తరం వైపు కదులుతోంది.

ఆదివారం ఉదయం 8:38 గంటలకు దిట్వా తుఫానుపై ఐఎండీ తాజా నవీకరణ ప్రకారం... తుఫాను గత 6 గంటల్లో గంటకు 07 కిలోమీటర్ల వేగంతో దాదాపు ఉత్తరం వైపు కదులుతూ నైరుతి బంగాళాఖాతం, దానిని ఆనుకుని ఉన్న ఉత్తర తమిళనాడు-పుదుచ్చేరి తీరాలలో కేంద్రీకృతమై ఉందని పేర్కొంది.  నవంబర్ 30న సాయంత్రం 05:30 గంటలకు ఇది 11.1°N, 80.6°E సమీపంలో కారైకల్‌కు తూర్పు-ఈశాన్య దిశలో దాదాపు 90 కి.మీ, జాఫ్నాకు ఈశాన్య దిశలో 170 కి.మీ, చెన్నైకి ఆగ్నేయ దిశలో 220 కి.మీ దూరంలో కేంద్రీకృతమై ఉంది. రాబోయే 24 గంటల్లో ఇది ఉత్తర తమిళనాడు-పుదుచ్చేరి తీరాలకు సమాంతరంగా దాదాపు ఉత్తరం వైపు కదిలే అవకాశం ఉంది. ఈ తుఫాను ఉత్తరం వైపు కదులుతూ, ఈ రోజు మధ్యాహ్నం, సాయంత్రం నాటికి తమిళనాడు-పుదుచ్చేరి తీరప్రాంతానికి కనీసం 70 కి.మీ, 30 కి.మీ దూరంలో నైరుతి బంగాళాఖాతంలో కేంద్రీకృతమై ఉంటుంది.