ఇటీవల ‘ఛాంపియన్’తో ప్రేక్షకుల ముందుకువచ్చిన రోషన్ మేకా ఓ రొమాంటిక్ కామెడీ సినిమాతో వస్తున్నాడు. ఇందులో ఆయన సరసన హీరోయిన్‌గా ప్రీతి ముకుందన్ నటిస్తోంది. ఈ చిత్రానికి ‘ఏమో ఏమో ఇది’ అనే టైటిల్‌ను ఖరారు చేశారు. శైలేష్ కొలను దర్శకత్వంలో నాగవంశీ, సాయి సౌజన్య నిర్మిస్తున్నారు. ప్రేమికుల దినోత్సవం కానుకగా టైటిల్‌తోపాటు గ్లింప్స్‌ను ఆవిష్కరించారు మేకర్స్. ఈ వీడియోలో నవతరం ప్రేమబంధాలు, ఆధునిక వివాహాలు వంటి అంశాలను వినోదా త్మకంగా చూపించారు.

ఈ చిత్రంలో రోషన్ మేకా ఇందులో అభయ్ పాత్రలో కనిపిస్తూ, జెన్‌జీ తరం ప్రేమను ఆవిష్కరించే పక్కింటి అబ్బాయిగా మెప్పించనున్నట్టు తెలుస్తోంది. ఇక అపూర్వ పాత్రలో ప్రీతి ముకుందన్ ప్రేక్షకుల హృదయాలను దోచుకోవడానికి సిద్ధమవుతోంది. త్వరలో చిత్రీకరణ ప్రారంభించుకోనున్న ఈ సినిమాను వచ్చే దసరాకు విడుదల చేయనున్నారు. ఈ చిత్రానికి సంగీతం: హేషామ్ అబ్దుల్ వహాబ్; ఛాయాగ్రహణం: వంశీ పచ్చిపులుసు.