నత్తతో పోటీపడుతున్న ఫైబల్ సిటీ రోడ్డు పనులు... 

రోడ్డు నిర్మాణానికి రూ. 2 కోట్లు కేటాయించిన మున్సిపల్ అధికారులు.. 

ఎమ్మెల్యే ప్రకాష్ గౌడ్ శంకుస్థాపనకు రెండు నెలలు పూర్తి..

పనుల అసంపూర్తిపై అటు ప్రభుత్వానికి ఇటు ఎమ్మెల్యేకు చెడ్డ పేరు..

బండ్లగూడ జాగీర్ (విజయక్రాంతి): రాజేంద్రనగర్ నియోజకవర్గం బండ్లగూడ జాగిర్ మున్సిపల్ కార్పొరేషన్ పరిధిలోని 14 వ డివిజన్ పైబల్ సిటీ రోడ్డు పనులు నత్తతో పోటీ పడుతున్నాయి. ఫెబల్ సిటీ, స్నేహిత హిల్స్ ప్రజలు ఈ రోడ్డుతో ఇబ్బంది పడని రోజు అంటూ లేదు వర్షాకాలం మొత్తం రోడ్డు వల్ల ఇబ్బందులు ఎదుర్కొన ఆ అవార్డుల ప్రజలు ప్రస్తుతం రోడ్డు మరమత్తుతో మరిన్నీ ఇబ్బందులు పడక తప్పడం లేదు స్థానిక ఎమ్మెల్యే ప్రకాష్ గౌడ్ స్పందించి రోడ్డు పనులను వెంటనే పూర్తిచేసి ప్రయాణికుల ఇబ్బందులు తొలగించాలని ఆయా కాలనీవాసులు ఎమ్మెల్యేకు విజ్ఞప్తి చేస్తున్నారు.

గత కొన్ని నెలల క్రితం స్థానిక ఎమ్మెల్యే ఆదేశాల మేరకు మున్సిపల్ అధికారులు  సాధారణ నిధుల నుండి రెండు కోట్ల రూపాయలను ఈ రోడ్డు మరమ్మతుకు కేటాయించారు. దాదాపు 800 మీటర్ల పొడవున చేపట్టే ఈ రోడ్డు పనులను దక్కించుకున్న గుత్తేదారు గత 20 రోజుల క్రితం ఈ పనులను ప్రారంభించారు. ప్రధాన రోడ్డుకు అనుకోనీ ఉన్న రెండు రోడ్లలో ఒక రోడ్డును మూసివేసి పనులను చేపడుతున్న కాంట్రాక్టర్ అనుకున్నంత వేగంగా పనులు చేపట్టడం లేదు  అనే విమర్శలు వినిపిస్తున్నాయి.

పనుల ప్రగతిని బట్టి మున్సిపాలిటీ అధికారులు కాంట్రాక్టర్ కు బిల్లులు చెల్లించడానికి సిద్ధంగా ఉన్నప్పటికీ పనుల ప్రగతిలో నిర్లక్ష్యంపై అటు అధికారులు ఇటు కాంట్రాక్టర్ పై సర్వత్ర విమర్శలు వినిపిస్తున్నాయి. బిల్లులు చెల్లించేందుకు నిధులు అందుబాటులో ఉన్నప్పటికీ పనులు నత్తనడకన సాగడంపై అటు ప్రభుత్వానికి ఇటు స్థానిక ఎమ్మెల్యేకు చెడ్డపేరు వచ్చే అవకాశం ఉన్నది. రోడ్డు నిర్మాణం కోసం సెప్టెంబర్ 15వ తేదీన రాజేంద్రనగర్ ఎమ్మెల్యే టి ప్రకాష్ గౌడ్ భూమి పూజ చేసి శిలాఫలకాన్ని కూడా ఆవిష్కరించారు. అప్పట్లో ఎమ్మెల్యే పనులను వెంటనే పూర్తి చేసి ప్రజలకు  మెరుగైన రోడ్డు సౌకర్యాన్ని అందుబాటులోకి తీసుకురావాలని అధికారులకు ఆదేశాలు ఇచ్చారు.. 

ఇటీవలే పని అగ్రిమెంట్ పూర్తి అయింది..

డిసెంబర్ చివరి నాటికి రోడ్డు పనులు పూర్తి చేస్తాం..

డిప్యూటీ ఈ ఈ యాదయ్య..

పైబల్ సిటీ రోడ్డు పనులను తీసుకున్న కాంట్రాక్టర్ ఇటీవలే రోడ్డు పనులకు సంబంధించి వర్క్ అగ్రిమెంట్ ను పూర్తి చేయడం జరిగింది. గత 20 రోజులుగా రోడ్డు పనులు చేపడుతున్నాం సాధ్యమైనంత త్వరగా రోడ్డు పనులను పూర్తి చేసి డిసెంబర్ చివరినాటికి ప్రజలకు రోడ్డును వినియోగంలోకి తెస్తామని మున్సిపల్ డిప్యూటీ ఈఈ యాదయ్య తెలిపారు.