హనోవర్ (జర్మనీ): ప్రపంచ డెఫ్ (బదిరుల) షూటింగ్ చాంపియన్‌షిప్‌లో భారత్ సత్తా చాటింది. మొత్తం 21 పతకాలతో పతకాల పట్టికలో భారత్ అగ్రస్థానంలో నిలిచి అదరహో అనిపించింది. ఇందులో ఏడు స్వర్ణాలు, ఏడు రజతాలు, ఏడు కాంస్యాలు గెలుచుకోవడం విశేషం. ఇక పోటీల్లో భాగంగా చివరి రోజు మహిళల 50 మీటర్ల రైఫిల్ పొజిషన్ ఈవెంట్‌లో షూటర్ మహిత్ సంధు స్వర్ణం కొల్లగొట్టగా.. పురుషుల 25 మీ పిస్టల్ విభాగంలో అభినవ్ పసిడి.. చేతన్ హన్మంత్ సప్కల్ కాంస్యం గెలుచుకున్నాడు. తెలుగు షూటర్ ధనుశ్ శ్రీకాంత్ (10 మీ ఎయిర్ రైఫిల్ విభాగంలో రెండు స్వర్ణాలతో మెరవడం విశేషం. ఉక్రెయిన్ 18 పతకాలతో (ఏడు స్వర్ణం, ఐదు రజతం, ఆరు కాంస్యాలు) రెండో స్థానంలో, ఆతిథ్య జర్మనీ 4 పతకాలతో మూడో స్థానంలో నిలిచింది.