హైదరాబాద్: భారత వ్యతిరేక కుట్ర కేసుకు సంబంధించి నిషేధిత కమ్యూనిస్ట్ పార్టీ ఆఫ్ ఇండియా (మావోయిస్ట్) సీనియర్ నాయకుడు సి పి మొయిదీన్ అలియాస్ గిరీష్‌పై జాతీయ దర్యాప్తు సంస్థ (National Investigation Agency) చార్జిషీట్ దాఖలు చేసింది. హైదరాబాద్‌లోని ఎన్ఐఏ ప్రత్యేక కోర్టులో అనుబంధ ఛార్జిషీట్ దాఖలు చేయబడింది. ఎన్ఐఏ గిరీష్‌పై చట్టవిరుద్ధ కార్యకలాపాల (నివారణ) చట్టం, 1967, భారత శిక్షాస్మృతి (IPC)లోని వివిధ నిబంధనల కింద కేసు నమోదు చేసింది. ఎన్ఐఏ ప్రకారం, భారత ప్రభుత్వానికి వ్యతిరేకంగా యుద్ధం చేయడానికి మావోయిస్టుల కుట్రలో మొయిదీన్ చురుకుగా పాల్గొన్నాడు. దర్యాప్తులో సేకరించిన ఆధారాలు సీపీఐ (మావోయిస్ట్) పశ్చిమ కనుమల ప్రత్యేక జోనల్ కమిటీ (WGSZC) పరిధిలోని మావోయిస్టు కార్యకలాపాలలో అతని ప్రధాన పాత్రను నిర్ధారించాయని ఆరోపించింది. 

సెప్టెంబర్ 2023లో కేంద్ర కమిటీ సభ్యుడు సంజయ్ దీపక్ రావు అరెస్టు తర్వాత ఆయన ప్రత్యేక జోనల్ కమిటీ సభ్యుడిగా పనిచేశారని, తరువాత డబ్ల్యూజీఎస్ జెడ్సీ(WGSZC) కార్యదర్శి పదవిని చేపట్టారని కూడా ఆరోపించబడింది. మొయిదీన్ పశ్చిమ కనుమల ప్రత్యేక జోనల్ కమిటీ ప్రాంతంలో పీపుల్స్ లిబరేషన్ గెరిల్లా ఆర్మీ (People's Liberation Guerrilla Army) స్క్వాడ్‌లను పర్యవేక్షించాడు. నియామక ప్రచారాలకు నాయకత్వం వహించాడు. మావోయిస్టు భావజాలాన్ని వ్యాప్తి చేశాడు. కేరళ-కర్ణాటక-తమిళనాడు ట్రై-జంక్షన్‌లో భద్రతా దళాలను లక్ష్యంగా చేసుకుని హింసాత్మక కార్యకలాపాలను ప్లాన్ చేశాడు. అతన్ని మొదట 2024 ఆగస్టులో కేరళ పోలీసులు అదుపులోకి తీసుకున్నారు. జనవరి 2025లో ఎన్ఐఏ అధికారికంగా అరెస్టు చేసింది. ఆయుధాలు, మందుగుండు సామగ్రి, మావోయిస్టు సాహిత్యాన్ని కలిగి ఉండగా పట్టుబడిన సంజయ్ దీపక్ రావును అరెస్టు చేసిన తర్వాత తెలంగాణ పోలీసులు సెప్టెంబర్ 2023లో ఈ కేసును మొదటిసారిగా నమోదు చేశారు. తరువాత ఎన్ఐఏ దర్యాప్తును చేపట్టింది. రావుపై చార్జిషీట్ దాఖలు చేసింది. సీపీఐ మావోయిస్ట్ పునరుద్ధరణ ప్రణాళికలను అడ్డుకోవడం, దాని పట్టణ,  సాయుధ నెట్‌వర్క్‌లను విచ్ఛిన్నం చేయడం లక్ష్యంగా విస్తృత దర్యాప్తును కొనసాగించింది.