స్థానిక పోరుపై ఉత్కంఠ!?
- ఎన్నికలు ఎప్పుడంటూ ఆశావహుల ఎదురుచూపులు
- గ్రామాల్లో మొదలవుతున్న రాజకీయ సమీకరణాలు
- రిజర్వేషన్లపైనే అభ్యర్థుల ఆశలు
- టికెట్ల కోసం పార్టీల్లో ఎవరి ప్రయత్నాలు వారివే!
- భద్రాద్రి జిల్లాలో స్థానిక పోరుపై పెరుగుతున్న ఆసక్తి
అశ్వాపురం, సెప్టెంబర్ 27 (విజయక్రాంతి): ఎంపీటీసీ, జడ్పీటీసీ ఎన్నికలు(Elections) ఎప్పుడు జరుగుతాయన్న అంశంపై అశ్వాపురం మండలంలో(Ashwapuram Mandal) రాజకీయ చర్చ జోరందుకుంటోంది. ఎన్నికల నిర్వహణ కోసం పోటీ చేయాలని భావిస్తున్న ఆశావహులు ఎదురుచూస్తుండగా, షెడ్యూల్తో పాటు రిజర్వేషన్లపై స్పష్టత వస్తేనే ఎవరు ఎక్కడి నుంచి బరిలోకి దిగుతారన్నది తేలనుంది. దీంతో ప్రధాన పార్టీలకు చెందిన నేతలతో పాటు స్వతంత్రంగా పోటీ చేయాలనుకుంటున్న ఆశావహులు సైతం గ్రామాల్లో పరిస్థితులను గమనిస్తూ తమ పరిచయాలను పెంచుకునే ప్రయత్నాల్లో ఉన్నారు.
భద్రాద్రి కొత్తగూడెం జిల్లాలో గ్రామీణ రాజకీయాలకు ఎంపీటీసీ, జడ్పీటీసీ ఎన్నికలు కీలకం కావడంతో అశ్వాపురం మండలంలోనూ రాజకీయ సమీకరణాలపై ఆసక్తి పెరుగుతోంది. గ్రామాల వారీగా సామాజిక సమీకరణాలు, స్థానికంగా నేతలకున్న పట్టు, గత ఎన్నికల ఫలితాలు, వ్యక్తిగత ప్రభావం తదితర అంశాలు అభ్యర్థుల ఎంపికలో కీలకంగా మారే అవకాశముందని రాజకీయ వర్గాల్లో చర్చ సాగుతోంది.
రిజర్వేషన్ ఎవరికి.. టికెట్ ఎవరికి..?
ఎన్నికల ప్రకటనకు ముందే ఆశావహుల్లో రిజర్వేషన్లపైనే ప్రధానంగా చర్చ జరుగుతోంది. ఏ ఎంపీటీసీ స్థానం ఏ వర్గానికి రిజర్వ్ అవుతుంది..? జడ్పీటీసీ రిజర్వేషన్ ఎలా ఉండబోతోంది..? అనే అంశాలపై ఉత్కంఠ నెలకొంది. అధికారికంగా రిజర్వేషన్లపై స్పష్టత వచ్చిన తర్వాతే అసలు రాజకీయ చిత్రం బయటపడనుంది. తమకు అనుకూలంగా రిజర్వేషన్ వస్తుందనే ఆశతో కొందరు ఆశావహులు ఇప్పటికే గ్రామాల్లో జరిగే కార్యక్రమాలకు హాజరవుతూ ప్రజలతో సంబంధాలను కొనసాగిస్తున్నారు.
పార్టీల్లో పెరగనున్న టికెట్ పోటీ
ఎన్నికల షెడ్యూల్ వెలువడిన తర్వాత ప్రధాన పార్టీల్లో టికెట్ల కోసం పోటీ మరింత పెరిగే పరిస్థితి కనిపిస్తోంది. గ్రామస్థాయిలో నాయకత్వం, ప్రజల్లో గుర్తింపు, పార్టీ కార్యక్రమాల్లో చురుకుదనం వంటి అంశాలు అభ్యర్థుల ఎంపికలో ప్రాధాన్యం సంతరించుకునే అవకాశం ఉంది. ఒకే స్థానం కోసం ఒకే పార్టీలో పలువురు ఆశావహులు ముందుకొస్తే అభ్యర్థుల ఎంపిక ఆయా పార్టీలకు సవాల్గా మారవచ్చనే చర్చ కూడా సాగుతోంది.
అశ్వాపురంలో ‘స్థానిక బలం’ కీలకం
అశ్వాపురం మండల రాజకీయాల్లో పార్టీ గుర్తుతో పాటు అభ్యర్థులకు గ్రామాల్లో ఉన్న వ్యక్తిగత పరిచయాలు, స్థానిక సమస్యలపై స్పందన, ప్రజలతో సంబంధాలు కూడా ప్రభావం చూపే అంశాలుగా రాజకీయ వర్గాలు భావిస్తున్నాయి. ఎంపీటీసీ స్థానాల్లో స్థానిక సమీకరణాలు ప్రధాన పాత్ర పోషిస్తే, జడ్పీటీసీ పోరులో మండలవ్యాప్తంగా అభ్యర్థులకున్న పరిచయాలు ప్రాధాన్యం సంతరించుకోనున్నాయి.
ఎన్నికలు ఎప్పుడు జరుగుతాయి..? రిజర్వేషన్లు ఎలా ఉంటాయి..? పార్టీల నుంచి ఎవరికి అవకాశం దక్కుతుంది..? స్వతంత్రులుగా ఎంతమంది బరిలో నిలుస్తారు..? అనే ప్రశ్నలకు అధికారిక ఎన్నికల ప్రక్రియ ప్రారంభమైన తర్వాతే స్పష్టత రానుంది. అప్పటివరకు అశ్వాపురం మండలంలో ఎంపీటీసీజడ్పీటీసీ ఎన్నికలపై ‘ఎదురుచూపుల రాజకీయం’ కొనసాగనుంది.
