సున్నం చెరువు సాక్షిగా సాగుతున్న.. నీటి దందాకు హైడ్రా అడ్డుకట్ట
- ఇళ్ల మాటున బోర్లు, ట్యాంకర్లకు భూగర్భ జలాల తరలింపు
- దశాబ్దాల అక్రమ వ్యాపారానికి బ్రేక్
- సీఎంసీ, రెవెన్యూ అధికారులతో సంయుక్తంగా హైడ్రా ఆపరేషన్
- అక్రమంగా ఇళ్లలోంచి నీటి సరఫరా చేసే పైపులు, మోటార్ల తొలగింపు
శేరిలింగంపల్లి, అక్టోబర్ 24 (విజయక్రాంతి): చెరువుల పరిరక్షణ, భూగర్భ జలాల సంరక్షణ(Conservation of Groundwater) లక్ష్యంగా పనిచేస్తున్న హైడ్రా మరో కీలక చర్యకు శ్రీకారం చుట్టింది. మాదాపూర్ పరిధిలోని సున్నం చెరువు సమీపంలో నివాసాల మాటున కొనసాగుతున్న అక్రమ నీటి వ్యాపారంపై(Illegal Water Business) అధికారులు ఉక్కుపాదం మోపారు.
ఇళ్లలో బోర్లు ఏర్పాటు చేసి, భారీ మోటార్ల సాయంతో భూగర్భ జలాలను తోడుతూ పైపుల ద్వారా ట్యాంకర్లకు సరఫరా చేస్తున్న అక్రమ వ్యవస్థను గుర్తించి తొలగింపు చర్యలు చేపట్టారు. దశాబ్దాలుగా కొనసాగుతున్న ఈ వ్యవహారానికి అడ్డుకట్ట వేసే క్రమంలో రెవెన్యూ, సీఎంసీ అధికారులతో కలిసి హైడ్రా సిబ్బంది ప్రత్యేక ఆపరేషన్ నిర్వహించారు. భారీ పోలీసు బందోబస్తు మధ్య సాగిన ఈ చర్యల్లో నివాసాల నుంచి బయటకు వస్తున్న పైపులు, నీటి సరఫరా వ్యవస్థలను తొలగించారు.
ఇళ్లే కేంద్రంగా ట్యాంకర్లే లక్ష్యంగా నీటి వ్యాపారం...
సున్నం చెరువు పరిసర ప్రాంతాల్లోని కొన్ని నివాసాలను కేంద్రంగా చేసుకుని అక్రమ నీటి సరఫరా వ్యవస్థ నడుస్తున్నట్లు అధికారులు గుర్తించారు. ఇళ్లలో బోర్లు తవ్వించి, వాటికి భారీ మోటార్లు అమర్చి భూగర్భ జలాలను నిరంతరం తోడుతున్నట్లు వెల్లడైంది. అక్కడి నుంచి ప్రత్యేక పైపులైన్ల ద్వారా నీటిని ట్యాంకర్లకు తరలించి వాణిజ్య అవసరాల కోసం విక్రయిస్తున్నట్లు గుర్తించారు. ఇలా భూగర్భ జలాలను ఇష్టారాజ్యంగా వినియోగిస్తూ అక్రమంగా ఆదాయం పొందుతున్న వ్యవస్థపై హైడ్రా చర్యలు చేపట్టింది.
కలుషిత నీటితో ప్రజారోగ్యానికి ముప్పు..
ఈ అక్రమ నీటి వ్యాపారం కేవలం భూగర్భ జలాల దోపిడీకే పరిమితం కాకుండా ప్రజారోగ్యానికి కూడా ప్రమాదకరంగా మారిందనే ఆందోళనలు వ్యక్తమవుతున్నాయి. సున్నం చెరువు సమీపంలోని భూగర్భ జలాల్లో ప్రమాదకర లోహాలు, హానికారక రసాయనాలు ఉన్నట్లు గుర్తించిన నేపథ్యంలో ఆ నీటిని తాగునీటిగా, ఇతర గృహ అవసరాలకు వినియోగించడం ప్రమాదకరమని అధికారులు పేర్కొంటున్నారు. నీటి నాణ్యతపై తగిన జాగ్రత్తలు లేకుండా ట్యాంకర్ల ద్వారా సరఫరా చేయడం ప్రజల ఆరోగ్యానికి ముప్పు కలిగించే అంశంగా మారింది.
రంగంలోకి దిగిన హైడ్రా.. అక్రమ వ్యవస్థ తొలగింపు...
అక్రమ నీటి దందాపై సమాచారం అందడంతో హైడ్రా అధికారులు క్షేత్రస్థాయిలో చర్యలకు దిగారు. రెవెన్యూ, సీఎంసీ అధికారుల సమన్వయంతో పోలీసుల బందోబస్తు ఏర్పాటు చేసి ప్రత్యేక ఆపరేషన్ చేపట్టారు. జేసీబీల సహాయంతో అక్రమంగా ఏర్పాటు చేసిన పైపులు, మోటార్లను తొలగించారు. చెరువుల పరిసరాల్లో సహజ నీటి వనరులను కాపాడటంతో పాటు భూగర్భ జలాల అక్రమ వినియోగాన్ని అరికట్టడమే లక్ష్యంగా ఈ చర్యలు చేపట్టారు. ప్రజల ఆరోగ్యానికి ముప్పు కలిగించే అక్రమ కార్యకలాపాలను ఉపేక్షించబోమని, ఇలాంటి వ్యవహారాలపై భవిష్యత్తులోనూ కఠిన చర్యలు కొనసాగిస్తామని అధికారులు స్పష్టం చేశారు.
