కుటుంబాలకు రూ.5 లక్షల బీమా భరోసా
టేకులపల్లి (విజయక్రాంతి): తెలంగాణ రాష్ట్ర ప్రభుత్వం ప్రతిష్టాత్మకంగా అమలు చేస్తున్న ఇందిరమ్మ కుటుంబ జీవిత బీమా (Indiramma Family Life Insurance) పథకంపై అధికారులు ప్రజలకు అవగాహన కల్పించారు. టేకులపల్లి మండలం కోయగూడెం గ్రామపంచాయతీ కార్యాలయంలో నిర్వహించిన కార్యక్రమంలో అదనపు కలెక్టర్ వేణుగోపాల్, తహసీల్దార్ వీరభద్రం, ఎంపీడీవో శ్రీదేవి పాల్గొని పథకం వివరాలను ప్రజలకు వివరించారు.
ఈ సందర్భంగా అధికారులు మాట్లాడుతూ.. అర్హులైన కుటుంబాలకు రూ.5 లక్షల జీవిత బీమా (Life Insurance) రక్షణ కల్పించడమే ఈ పథకం ప్రధాన ఉద్దేశమని తెలిపారు. బీమా ప్రీమియం (Insurance Premium) మొత్తాన్ని లబ్ధిదారులు చెల్లించాల్సిన అవసరం లేదని, ప్రభుత్వమే పూర్తిగా భరిస్తుందని స్పష్టం చేశారు. ఈ పథకానికి సంబంధించిన ప్రక్రియకు నెల రోజుల గడువు ఉంటుందని, అర్హులైన ప్రతి ఒక్కరూ ఈ అవకాశాన్ని సద్వినియోగం చేసుకోవాలని సూచించారు. కుటుంబ పెద్దకు అనుకోని ప్రమాదం సంభవించినప్పుడు ఆర్థికంగా కుటుంబానికి అండగా నిలవడమే పథకం లక్ష్యమని వివరించారు.
ఈ కార్యక్రమంలో ఎంపీఓ దండ్యాల రామారావు, కార్యదర్శి వసంతరావు, కోయగూడెం ఉపసర్పంచ్ అనుష, ఇల్లందు నియోజకవర్గ కాంగ్రెస్ నాయకులు కోరం ఉమా సురేందర్, గ్రామ ప్రజలు తదితరులు పాల్గొన్నారు.