ప్రపంచస్థాయి వర్సిటీగా మన్మోహన్ సింగ్ యూనివర్సిటీ
భద్రాద్రి కొత్తగూడెం, నవంబర్ 21 (విజయక్రాంతి): డాక్టర్ మన్మోహన్ సింగ్ ఎర్త్ సైన్సెస్ యూనివర్సిటీని ప్రపంచస్థాయి ప్రమాణాలతో కూడిన ప్రతిష్టాత్మక విద్యాసంస్థగా తీర్చిదిద్దుతామని రాష్ట్ర వ్యవసాయ, సహకార, మార్కెటింగ్, చేనేత శాఖల మంత్రి తుమ్మల నాగేశ్వరరావు తెలిపారు. యూనివర్సిటీ అభివృద్ధికి అవసరమైన నిధులు త్వరలోనే సమకూర్చడంతో పాటు పూర్తిస్థాయి వైస్ ఛాన్సలర్, బోధనా సిబ్బంది నియామకాలు చేపడతామని వెల్లడించారు.
1976లో కొత్తగూడెం స్కూల్ ఆఫ్ మైన్స్ (Kothagudem School of Mines)గా ప్రారంభమై 50 సంవత్సరాలు పూర్తి చేసుకున్న సందర్భంగా శనివారం నిర్వహించిన స్వర్ణోత్సవ వేడుకలకు మంత్రి తుమ్మల ముఖ్య అతిథిగా హాజరయ్యారు. కొత్తగూడెం ఎమ్మెల్యే కూనంనేని సాంబశివరావు, మున్సిపల్ కార్పొరేషన్ మేయర్ మూడ్ గణేష్, జిల్లా అదనపు కలెక్టర్ డి.వేణుగోపాల్తో కలిసి కార్యక్రమంలో పాల్గొన్నారు. ఈ సందర్భంగా మైనింగ్ ఇంజనీరింగ్ అసోసియేషన్ ఆఫ్ ఇండియా స్టూడెంట్ చాప్టర్ను ప్రారంభించారు.
మంత్రి మాట్లాడుతూ.. ఖనిజ సంపదకు నిలయమైన కొత్తగూడెం ప్రాంతంలో మైనింగ్ విద్యను అభివృద్ధి చేయాలనే లక్ష్యంతో 1976లో ఈ విద్యాసంస్థను ఏర్పాటు చేశారని గుర్తుచేశారు. ఐదు దశాబ్దాలుగా మైనింగ్ రంగానికి నైపుణ్యం కలిగిన మానవ వనరులను అందిస్తోందన్నారు. ఇక్కడ చదువుకున్న వేలాది మంది విద్యార్థులు సింగరేణి, కోల్ ఇండియా, కేంద్ర ప్రభుత్వంలోని వివిధ శాఖలతో పాటు దేశవిదేశాల్లో ఉన్నత పదవులు చేపట్టి సంస్థకు గుర్తింపు తీసుకొచ్చారని కొనియాడారు.
భద్రాద్రి కొత్తగూడెం జిల్లాలో అపారమైన ఖనిజ సంపద, సహజ వనరులు ఉన్నందున వాటి అన్వేషణ, వెలికితీత, ఆధునిక సాంకేతిక పరిజ్ఞానం, నూతన ఆవిష్కరణలపై పరిశోధనలు జరిగేలా ఎర్త్ సైన్సెస్ విశ్వవిద్యాలయం ఏర్పాటు చేయాలనే ప్రతిపాదనను ముఖ్యమంత్రి రేవంత్ రెడ్డి దృష్టికి తీసుకెళ్లినట్లు తెలిపారు. ముఖ్యమంత్రి సానుకూలంగా స్పందించి విశ్వవిద్యాలయ ఏర్పాటుకు సహకరించారని చెప్పారు. దేశ ఆర్థిక అభివృద్ధికి విశేష సేవలందించిన మాజీ ప్రధాని డాక్టర్ మన్మోహన్ సింగ్ పేరు ఈ విశ్వవిద్యాలయానికి పెట్టడం గర్వకారణమన్నారు.
విశ్వవిద్యాలయానికి పూర్తిస్థాయి వైస్ ఛాన్సలర్ (Vice Chancellor), బోధనా సిబ్బంది నియామకాలతో పాటు మౌలిక వసతుల కల్పనపై ప్రభుత్వం ప్రత్యేక దృష్టి సారించిందని మంత్రి తెలిపారు. పూర్వ విద్యార్థులు సూచించిన అర్హులైన నిపుణుల పేర్లను ముఖ్యమంత్రి దృష్టికి తీసుకెళ్లామని, త్వరలోనే నియామక ప్రక్రియ చేపడతామని వెల్లడించారు.
విశ్వవిద్యాలయ మాస్టర్ ప్లాన్ (Master Plan)కు త్వరలో ఆమోదం తీసుకొచ్చి భవనాలు, ఆధునిక ప్రయోగశాలలు, గ్రంథాలయం, విద్యార్థులు, అధ్యాపకుల నివాస సముదాయాలను దశలవారీగా అభివృద్ధి చేస్తామని చెప్పారు. ఇందుకోసం సింగరేణి, కోల్ ఇండియా తదితర సంస్థల సహకారంతో నిధులు సమీకరిస్తామన్నారు. కోల్ ఇండియా, సింగరేణి, ఎన్ఎండీసీ, ఐఐటీలు, ఇతర విద్యా, పరిశోధనా సంస్థల ప్రతినిధులతో హైదరాబాద్లో సమావేశం నిర్వహించి సమగ్ర అభివృద్ధి ప్రణాళిక (Development Roadmap) రూపొందిస్తామని తెలిపారు.
పూర్వ విద్యార్థులు తమ అనుభవం, పరిచయాలను ఉపయోగించి ఆర్థిక సహకారంతో పాటు సాంకేతిక పరిజ్ఞానం, నిపుణుల సేవలు అందించాలని కోరారు. మైనింగ్ రంగంలో వారు సంపాదించిన అనుభవాన్ని విద్యార్థులకు అందించడం ద్వారా పరిశ్రమలకు అవసరమైన నైపుణ్యాలు కలిగిన యువతను తయారు చేయవచ్చన్నారు.
కొత్తగూడెం ఎమ్మెల్యే కూనంనేని సాంబశివరావు మాట్లాడుతూ.. కొత్తగూడెం స్కూల్ ఆఫ్ మైన్స్ 50 సంవత్సరాల ప్రస్థానం గర్వకారణమన్నారు. ముఖ్యమంత్రి రేవంత్ రెడ్డి సహకారం, మంత్రి తుమ్మల ప్రత్యేక చొరవతో ఈ విద్యాసంస్థ ఎర్త్ సైన్సెస్ విశ్వవిద్యాలయంగా రూపాంతరం చెందడం అభినందనీయమన్నారు.
విశ్వవిద్యాలయ పరిధిలో అంతర్జాతీయ ప్రమాణాలతో కూడిన భారీ క్రీడా స్టేడియం నిర్మాణానికి ప్రతిపాదనలు ఉన్నాయని తెలిపారు. సుమారు 50 నుంచి 60 ఎకరాల విస్తీర్ణంలో క్రీడా ప్రాంగణం ఏర్పాటు చేస్తే అంతర్జాతీయ క్రీడా పోటీల నిర్వహణకు అవకాశం ఉంటుందన్నారు. రాష్ట్ర బడ్జెట్లో విశ్వవిద్యాలయ అభివృద్ధికి రూ.250 కోట్ల నిధుల కేటాయింపు ప్రతిపాదనను ప్రస్తావిస్తూ, ఆధునిక ప్రయోగశాలలు, గ్రంథాలయం, క్రీడా సదుపాయాల కల్పనకు ప్రణాళికలు రూపొందిస్తున్నట్లు వివరించారు. విద్యార్థులు ఈ అవకాశాలను సద్వినియోగం చేసుకొని ఉన్నత లక్ష్యాలతో చదువుకుని దేశానికి సేవలందించాలని పిలుపునిచ్చారు.
పూర్వ విద్యార్థుల సమ్మేళనం పాత జ్ఞాపకాలను నెమరువేసుకోవడంతో పాటు సంస్థ అభివృద్ధికి సమష్టిగా కృషి చేసే వేదికగా నిలుస్తుందని పేర్కొన్నారు. ఈ కార్యక్రమంలో కొత్తగూడెం ఆర్డీవో మధు, పాల్వంచ తహసీల్దార్ ధారా ప్రసాద్, జిల్లా పంచాయతీ అధికారి అనూష, విశ్వవిద్యాలయ పూర్వ విద్యార్థుల సంఘం అధ్యక్షుడు బిక్కి రమేష్ కుమార్ తదితరులు పాల్గొన్నారు.