అందరిదీ పోతే నాదీ పోతది...అయిజలో హాట్‌టాపిక్!
అయిజ (విజయక్రాంతి): ఇనాం భూములు కొన్నాం.. ఎప్పటికైనా ఇనాం భూములు పోతే అందరివీ పోతాయి.. నావీ పోతాయి” అంటూ అయిజ మాజీ మున్సిపల్ వైస్ చైర్మన్ చేసిన వ్యాఖ్యలు పట్టణంలో చర్చనీయాంశంగా మారాయి. అయిజలోని 96 ఎకరాల మసీదు మాన్యం భూమికి సంబంధించి ఆయన చేసిన వ్యాఖ్యలు ప్రస్తుతం హాట్‌టాపిక్‌గా (Hot Topic) మారాయి.
గత కొద్దిరోజులుగా అయిజ పట్టణంలో అధికార పార్టీకి చెందిన కౌన్సిలర్లు, బీఆర్‌ఎస్ పార్టీకి చెందిన మున్సిపల్ చైర్మన్, కౌన్సిలర్ల మధ్య వివాదం కొనసాగుతోంది. ఇరు వర్గాలు వరుసగా మీడియా సమావేశాలు (Press Meets) నిర్వహిస్తూ ఒకరిపై ఒకరు ఆరోపణలు చేసుకుంటున్నాయి.
ఈ క్రమంలో శనివారం బీఆర్‌ఎస్ పార్టీకి చెందిన మున్సిపల్ చైర్మన్‌తో పాటు పలువురు నాయకులు నిర్వహించిన మీడియా సమావేశంలో మాజీ వైస్ చైర్మన్ మసీదు మాన్యం భూమి వ్యవహారాన్ని ప్రస్తావించారు. అయిజలో ముళ్ల నబీ సాబ్‌కు చెందినదిగా పేర్కొంటున్న 96 ఎకరాల మసీదు మాన్యం భూమి వారసుల మధ్య జరిగిన పంపకాల వివరాలను ఆయన వెల్లడించారు.
ముళ్ల నబీ సాబ్ ముగ్గురు కుమారుల వారసత్వ భూముల్లో ఒకరి నుంచి కొంత ఇనాం భూమిని కొనుగోలు చేసి, ఖాతా నంబర్ మార్చుకొని తన పేరు మీద కొంత భూమిని రిజిస్ట్రేషన్ (Registration) చేయించుకున్నట్లు ఆయన తెలిపారు. ఎప్పటికైనా ఇనాం భూములు పోతాయనే ఆలోచనతోనే, ఆ కుటుంబానికి న్యాయం చేయాలనే ఉద్దేశంతో భూమిని కొనుగోలు చేసినట్లు పేర్కొన్నారు.
అయితే, మసీదు మాన్యం భూమి కొనుగోలు, ఖాతా మార్పు, రిజిస్ట్రేషన్ వ్యవహారాలపై ఆయన చేసిన వ్యాఖ్యలు చర్చకు దారితీశాయి. ఇనాం భూముల చట్టబద్ధత, సంబంధిత భూ రికార్డులు (Land Records), కొనుగోలు ప్రక్రియపై అధికారులు స్పష్టత ఇవ్వాల్సిన అవసరం ఉందని స్థానికంగా అభిప్రాయాలు వ్యక్తమవుతున్నాయి..
