బాలిక ఘటనపై కదిలిన యంత్రాంగం
బాన్సువాడ, నవంబర్ 19 (విజయక్రాంతి): కామారెడ్డి జిల్లా బీర్కూర్ మండలంలోని ఓ గ్రామంలో మైనర్ బాలికపై జరిగినట్లు ఆరోపణలు ఎదుర్కొంటున్న లైంగిక దాడి ఘటనపై జిల్లా యంత్రాంగం దృష్టి సారించింది. ఈ వ్యవహారాన్ని జిల్లా ఉన్నతాధికారులు తీవ్రంగా పరిగణించినట్లు తెలుస్తోంది. ఘటనకు సంబంధించిన పూర్తి వివరాలను వెలికితీయాలని జిల్లా ఎస్పీ రాజేష్ చంద్ర, కలెక్టర్ ఆశిష్ సాంగ్వాన్ విచారణకు ఆదేశించినట్లు సమాచారం.
ఈ నేపథ్యంలో ఇంటెలిజెన్స్ (Intelligence), జిల్లా చైల్డ్ ప్రొటెక్షన్ (Child Protection) విభాగం అధికారులు రంగంలోకి దిగి వివిధ కోణాల్లో విచారణ చేపట్టినట్లు తెలిసింది. బాలికపై జరిగినట్లు ఆరోపణలు ఎదుర్కొంటున్న ఘటన వెనుక ఉన్న వ్యక్తులు, వారికి సహకరించినవారు, వ్యవహారాన్ని పరిష్కరించేందుకు ప్రయత్నించినట్లు ఆరోపణలు ఎదుర్కొంటున్న మధ్యవర్తుల పాత్రపై అధికారులు ఆరా తీస్తున్నట్లు సమాచారం.
ముఖ్యంగా ఘటన వెలుగులోకి వచ్చిన తర్వాత ఎవరెవరు జోక్యం చేసుకున్నారు? బాలిక కుటుంబంపై ఎవరైనా ఒత్తిడి తెచ్చారా? వ్యవహారం బయటకు రాకుండా అడ్డుకునే ప్రయత్నాలు జరిగాయా? అనే అంశాలపై కూడా విచారణ (Investigation) కొనసాగుతున్నట్లు తెలుస్తోంది.
వివిధ శాఖల అధికారులు సేకరించిన వివరాలు, విచారణ నివేదికలను పరిశీలించిన అనంతరం బాధ్యులపై చట్టప్రకారం చర్యలు తీసుకునే అవకాశం ఉంది. బాలికకు న్యాయం చేయడంతో పాటు బాధిత కుటుంబానికి రక్షణ కల్పించడం, ఘటనకు సంబంధించిన వాస్తవాలను వెలికితీయడంపై అధికారులు దృష్టి పెట్టారు. జిల్లా ఉన్నతాధికారుల ఆదేశాలతో ఈ వ్యవహారంలో తదుపరి పరిణామాలపై ఆసక్తి నెలకొంది.