వ్యభిచార ముఠా నిర్వాహకుడిపై పీడీ యాక్ట్

కేసు నమోదు చేసిన ఖమ్మం పోలీసులు

ఖమ్మం, సెప్టెంబర్ 16(విజయక్రాంతి): మహిళలను వ్యభిచారంలోకి దింపుతూ ఆర్థిక లాభాలు పొందుతున్నట్లు ఆరోపణలు ఎదుర్కొంటున్న ఓ వ్యక్తిపై ఖమ్మం పోలీస్ కమిషనర్ సునీల్ దత్ పీడీ యాక్ట్ కింద నిర్బంధ ఉత్తర్వులు జారీ చేశారు. ఖమ్మం జిల్లా ముదిగొండ మండలం చిరుమర్రి గ్రామానికి చెందిన బత్తుల బాలకృష్ణ (30) పై ఈ చర్యలు తీసుకున్నట్లు పోలీస్ కమిషనర్ కార్యాలయం వెల్లడించింది.

పోలీసుల వివరాల ప్రకారం.. బాలకృష్ణ ఆర్థిక లాభాల కోసం జిల్లాలో వ్యభిచార గృహాలను నిర్వహించడంతో పాటు మహిళలను వ్యభిచారంలోకి తీసుకువచ్చే అసాంఘిక, అక్రమ కార్యకలాపాలకు పాల్పడుతున్నట్లు దర్యాప్తులో వెల్లడైంది. ఈ క్రమంలో అతనిపై ఖమ్మం టూ టౌన్, ఖమ్మం త్రీ టౌన్ పోలీస్ స్టేషన్ల పరిధిలో అనైతిక రవాణా, వ్యభిచార నిరోధక చట్టం కింద కేసులు నమోదైనట్లు పోలీసులు తెలిపారు.

లాడ్జిపై పోలీసుల దాడి

2026 జనవరి 6న విశ్వసనీయ సమాచారం అందడంతో ఖమ్మం గాంధీచౌక్‌లోని ఓ లాడ్జిలో పోలీసులు తనిఖీలు నిర్వహించినట్లు అధికారులు తెలిపారు. వ్యభిచార కార్యకలాపాల కోసం లాడ్జిలో గదిని పొందేందుకు అధిక మొత్తంలో డబ్బు చెల్లించినట్లు దర్యాప్తులో గుర్తించినట్లు పేర్కొన్నారు. ఈ కేసులో ప్రధాన నిందితుడు బత్తుల బాలకృష్ణతో పాటు మెరెడ్డి సత్యవతి, లాడ్జి మేనేజర్ అలకుంట్ల శ్రీకాంత్ కలిసి కుట్రపూరితంగా వ్యవహరించినట్లు పోలీసులు తెలిపారు.

కాకినాడకు చెందిన ఓ మహిళ ఆర్థిక ఇబ్బందులను ఆసరాగా చేసుకుని ఆమెను వ్యభిచారంలోకి తీసుకువచ్చినట్లు, అనంతరం ఖమ్మంకు తరలించి లాడ్జి గదిలో ఉంచి కస్టమర్ల నుంచి డబ్బులు వసూలు చేసినట్లు కేసు దర్యాప్తులో వెల్లడైనట్లు పోలీసులు పేర్కొన్నారు.

పీడీ యాక్ట్ కింద నిర్బంధం

నిందితుడు బాలకృష్ణ నేర ప్రవర్తనను నిరోధించడంతో పాటు శాంతిభద్రతలను పరిరక్షించేందుకు ప్రమాదకర కార్యకలాపాల నిరోధక చట్టం–1986 (పీడీ యాక్ట్) సెక్షన్ 3(2) కింద నిర్బంధ ఉత్తర్వులు జారీ చేసినట్లు పోలీస్ కమిషనర్ సునీల్ దత్ తెలిపారు.

పీడీ యాక్ట్ కింద ఉత్తర్వులు జారీ చేసిన అనంతరం బత్తుల బాలకృష్ణను చంచల్‌గూడ సెంట్రల్ జైలుకు తరలించినట్లు ఖమ్మం పోలీస్ కమిషనర్ కార్యాలయం వెల్లడించింది. వ్యభిచారం, మహిళల అక్రమ రవాణా వంటి అసాంఘిక కార్యకలాపాలకు పాల్పడే వ్యక్తులపై చట్టపరంగా కఠిన చర్యలు తీసుకుంటామని పోలీసులు స్పష్టం చేశారు.