సూర్యాపేటలో ఏసీబీ సోదాలు

సూర్యాపేట: అవినీతి నిరోధక శాఖ (ఏసీబీ) అధికారుల తనిఖీలతో సూర్యాపేట పట్టణంలో చర్చ మొదలైంది. హైదరాబాద్ మెప్మా (MEPMA) అదనపు డైరెక్టర్‌కు సంబంధించిన నివాసంతో పాటు ఆయన బంధువుల ఇళ్లలో ఏసీబీ బృందాలు తనిఖీలు చేపట్టాయి. ఉదయం నుంచే పలు ప్రాంతాల్లో ఏకకాలంలో ఈ సోదాలు కొనసాగుతున్నట్లు సమాచారం.

గతంలో జీహెచ్‌ఎంసీ, నిజామాబాద్ మున్సిపల్ కమిషనర్‌గా పనిచేసిన సదరు అధికారి సూర్యాపేటలోని సాయిబాబా గుడి సమీప నివాసంలో అధికారులు పత్రాలను పరిశీలించినట్లు తెలుస్తోంది. పట్టణంలోని గాంధీనగర్‌లో ఉన్న ఆయన బంధువుల ఇళ్లలోనూ ఏసీబీ బృందాలు తనిఖీలు నిర్వహిస్తున్నట్లు సమాచారం.

ఆదాయానికి మించిన ఆస్తుల ఆరోపణలకు సంబంధించి ఈ తనిఖీలు జరుగుతున్నట్లు ప్రాథమిక సమాచారం. సోదాల్లో భాగంగా ఆస్తులకు సంబంధించిన పత్రాలు, ఇతర వివరాలను అధికారులు పరిశీలించినట్లు తెలుస్తోంది. అయితే తనిఖీల్లో ఏయే పత్రాలు స్వాధీనం చేసుకున్నారు, ఆస్తుల విలువ ఎంత అనే వివరాలపై ఇంకా అధికారిక స్పష్టత రావాల్సి ఉంది. ఏసీబీ అధికారుల ప్రకటన వెలువడిన తర్వాతే సోదాలకు సంబంధించిన పూర్తి వివరాలు వెల్లడయ్యే అవకాశం ఉంది. ప్రస్తుతం ఈ తనిఖీలకు సంబంధించి అధికారిక ప్రకటన కోసం ఎదురుచూపులు కొనసాగుతున్నాయి.