తెలుగు రాష్ట్రాలకు వెదర్ అప్‌డేట్
హైదరాబాద్: తెలుగు రాష్ట్రాల్లో వాతావరణం మారనుంది. బంగాళాఖాతంలో ఏర్పడిన అల్పపీడనం, మరో అల్పపీడనం ఏర్పడే అవకాశాల నేపథ్యంలో ఆంధ్రప్రదేశ్, తెలంగాణకు వాతావరణ శాఖ తాజా సూచనలు జారీ చేసింది. ఏపీలో రాబోయే మూడు రోజుల పాటు పలు ప్రాంతాల్లో వర్షాలు కురిసే అవకాశం ఉండగా, తెలంగాణలో బుధవారం అక్కడక్కడా వానలు, ఉరుములు, మెరుపులతో కూడిన ఈదురుగాలులు వీచే అవకాశం ఉంది.
బంగాళాఖాతంలో అల్పపీడనం
నైరుతి బంగాళాఖాతం, దానిని ఆనుకుని ఉన్న తమిళనాడు తీర ప్రాంతంలో అక్టోబర్ 21 ఉదయం అల్పపీడనం ఏర్పడింది. దీనికి అనుబంధంగా ఉపరితల ఆవర్తనం సముద్ర మట్టానికి సుమారు 5.8 కిలోమీటర్ల ఎత్తు వరకు విస్తరించి ఉంది. మరోవైపు, థాయిలాండ్ గల్ఫ్‌, థాయిలాండ్, మయన్మార్ పరిసరాల్లో కొనసాగుతున్న ఉపరితల ఆవర్తనం ఉత్తర అండమాన్ సముద్రంలోకి ప్రవేశించే అవకాశం ఉందని వాతావరణ శాఖ అంచనా వేసింది.
అనంతరం ఇది పశ్చిమ–వాయువ్య దిశగా కదిలే అవకాశం ఉంది. దీని ప్రభావంతో అక్టోబర్ 23 నాటికి ఆగ్నేయ బంగాళాఖాతం, దానిని ఆనుకుని ఉన్న తూర్పు మధ్య బంగాళాఖాతంలో మరో అల్పపీడనం ఏర్పడే సూచనలు ఉన్నాయి. ఆ తర్వాతి మూడు రోజుల్లో ఇది మరింత బలపడే అవకాశం ఉందని అంచనా వేస్తున్నారు.
ఆంధ్రప్రదేశ్‌లో మూడు రోజుల పాటు వర్షాలు
కోస్తాంధ్ర, యానాం, రాయలసీమ ప్రాంతాల్లో రాబోయే మూడు రోజుల పాటు అక్కడక్కడా తేలికపాటి నుంచి మోస్తరు వర్షాలు లేదా ఉరుములతో కూడిన జల్లులు కురిసే అవకాశం ఉంది. కొన్ని ప్రాంతాల్లో భారీ వర్షాలు కురిసే అవకాశాన్ని కూడా వాతావరణ శాఖ సూచించింది. ఉరుములు, మెరుపులతో పాటు బలమైన గాలులు వీచే అవకాశం ఉంది. గాలి వేగం గంటకు 30–40 కిలోమీటర్లుగా ఉండొచ్చని, కొన్ని సందర్భాల్లో గరిష్ఠంగా 50 కిలోమీటర్ల వరకు చేరవచ్చని అమరావతి వాతావరణ కేంద్రం తెలిపింది. దీంతో వర్షాలు కురిసే ప్రాంతాల్లో ప్రజలు అప్రమత్తంగా ఉండాలని సూచిస్తున్నారు.
తెలంగాణలో నేడు వర్షాలు.. ఆ తర్వాత పొడి వాతావరణం
తెలంగాణలో బుధవారం అక్కడక్కడా తేలికపాటి నుంచి మోస్తరు వర్షాలు కురిసే అవకాశం ఉంది. రాష్ట్రంలోని కొన్ని ప్రాంతాల్లో ఉరుములు, మెరుపులతో పాటు గంటకు 30–40 కిలోమీటర్ల వేగంతో ఈదురుగాలులు వీచే సూచనలు ఉన్నాయని హైదరాబాద్ వాతావరణ కేంద్రం తెలిపింది. అయితే గురువారం, శుక్రవారం రాష్ట్రంలో పొడి వాతావరణం ఏర్పడే అవకాశం ఉందని అంచనా వేసింది. ప్రాంతాలవారీగా వాతావరణ పరిస్థితుల్లో మార్పులు ఉండొచ్చని, తాజా హెచ్చరికలను గమనించాలని సూచించింది.
