రైస్ మిల్లర్లకు సుప్రీం షాక్
హైదరాబాద్: తెలంగాణలో డిఫాల్ట్ రైస్ మిల్లర్ల(Default Rice Millers)కు సంబంధించిన కేసుల వ్యవహారం సుప్రీంకోర్టు(Supreme Court)లో కీలక మలుపు తిరిగింది. మిల్లర్లపై ఎఫ్ఐఆర్ల నమోదును అడ్డుకోవాలని కోరుతూ దాఖలైన పిటిషన్లను మిల్లర్ల తరఫు న్యాయవాదులు ఉపసంహరించుకున్నారు. దీంతో ఈ వ్యవహారంలో మిల్లర్లకు ఎదురుదెబ్బ తగిలినట్లయింది.
ప్రభుత్వానికి తిరిగి అప్పగించాల్సిన ధాన్యం విషయంలో అవకతవకలు జరిగాయనే ఆరోపణలపై రాష్ట్రవ్యాప్తంగా డిఫాల్ట్ మిల్లర్లకు సంబంధించి ఇప్పటికే 540 ఎఫ్ఐఆర్లు నమోదయ్యాయి. లక్షల మెట్రిక్ టన్నుల ప్రభుత్వ ధాన్యం పక్కదారి పట్టిందనే ఆరోపణలు ఈ వ్యవహారాన్ని మరింత తీవ్రతరం చేశాయి.
ఎఫ్ఐఆర్ల నమోదును నిలువరించేందుకు మిల్లర్ల తరఫున న్యాయస్థానాన్ని ఆశ్రయించినప్పటికీ, తాజాగా పిటిషన్ల ఉపసంహరణతో దర్యాప్తు, తదుపరి న్యాయపరమైన చర్యలపై ఆసక్తి నెలకొంది. డిఫాల్ట్ మిల్లర్ల వ్యవహారంలో ఇకపై ఎలాంటి పరిణామాలు చోటుచేసుకుంటాయన్నది చర్చనీయాంశంగా మారింది.