ఫొటోలతో ఫేక్ ప్రచారమా?.. చర్యలు తప్పవు

కొల్చారం, అక్టోబర్‌ 13: తమ అనుమతి లేకుండా ఫొటోలను ఉపయోగిస్తూ, వివరణ తీసుకోకుండానే అసత్య ఆరోపణలతో సామాజిక మాధ్యమాలు, వార్తాపత్రికల్లో వార్తలు ప్రచారం చేస్తున్న వారిపై చట్టపరమైన చర్యలు తీసుకుంటామని వరిగుంతం గ్రామ సర్పంచ్‌ పుట్లగళ్ల మోహన్‌, ఉపసర్పంచ్‌ బాంచ వీరేశం హెచ్చరించారు. తమ సొంత పార్టీకే చెందిన ఓ జిల్లా స్థాయి నాయకుడు కావాలనే తమ ఫొటోలను ఉపయోగిస్తూ, వివిధ రకాల వదంతులు సృష్టిస్తున్నారని వారు ఆరోపించారు. వాటిని సామాజిక మాధ్యమాల్లో స్థితిగతులుగా (Status Updates) ప్రచారం చేస్తూ తమ ప్రతిష్ఠను దెబ్బతీసేలా వ్యవహరిస్తున్నారని ఆవేదన వ్యక్తం చేశారు. ఇలాంటి చర్యలతో ప్రజల్లో తమను చులకన చేసే ప్రయత్నం జరుగుతోందని పేర్కొన్నారు.గ్రామపంచాయతీ నిధుల దుర్వినియోగం జరిగినట్లు కొందరు వ్యక్తులు నిరాధార ఆరోపణలు చేస్తూ, తమ ఫొటోలతో ఇష్టానుసారంగా వార్తలు ప్రచారం చేస్తున్నారని సర్పంచ్‌, ఉపసర్పంచ్‌ తెలిపారు. పంచాయతీ పనులకు సంబంధించి కొలతల పుస్తకం (Measurement Book) రికార్డుల ప్రకారం పూర్తయిన పనులకు మాత్రమే నిధులు డ్రా చేసినట్లు స్పష్టం చేశారు.

గ్రామపంచాయతీ పాలకవర్గ సభ్యుల తీర్మానాల మేరకే అభివృద్ధి పనులు చేపట్టామని వెల్లడించారు. నిధుల వినియోగానికి సంబంధించి రికార్డుల ఆధారంగానే పనులు నిర్వహించినట్లు పేర్కొన్నారు. తమపై వస్తున్న ఆరోపణల్లో వాస్తవం లేదని వారు ఖండించారు.కావాలనే కొందరు పార్టీ నాయకులు నిరాధార ఆరోపణలు చేస్తూ తమ ప్రతిష్ఠకు భంగం కలిగించే ప్రయత్నం చేస్తున్నారని సర్పంచ్‌ మోహన్‌, ఉపసర్పంచ్‌ వీరేశం ఆరోపించారు. తమ వివరణ తీసుకోకుండా ఫొటోలతో వార్తలు ప్రచారం చేయడం సరికాదన్నారు. ఇప్పటికైనా వ్యక్తిగత ఆరోపణలు, వదంతులకు స్వస్తి పలికి గ్రామాభివృద్ధికి సహకరించాలని వారు కోరారు. అనుమతి లేకుండా ఫొటోలను ఉపయోగించడం, అసత్య ప్రచారం చేయడం వంటి చర్యలు కొనసాగితే సంబంధిత వారిపై చట్టపరమైన చర్యలు (Legal Action) తీసుకుంటామని హెచ్చరించారు.