శ్రీలీలకు చిరు కానుక!

చిరంజీవి హీరోగా నటిస్తున్న చిత్రం ‘విశ్వంభర’. వశిష్ట దర్శకత్వంలో యూవీ క్రియేషన్స్ సంస్థ నిర్మిస్తున్న ఈ సినిమా చిత్రీకరణ ప్రస్తుతం హైదరాబాద్‌లోని అన్నపూర్ణ సెవెన్ ఏకర్స్‌లో జరుగుతోంది. అక్కడే మరో షూటింగ్‌లో పాల్గొన్న అందాల తార శ్రీలీలకు తనెంతో అభిమానించే చిరంజీవి ప్రస్తుతం ఇదే స్టూడియోలో ఉన్నారని తెలిసింది. దీంతో ఆమె విశ్వంభర సెట్స్‌కు వెళ్లి చిరంజీవిని కలిసింది.

మహిళా దినోత్సవాన తనను కలిసిన శ్రీలీలను చిరు అరుదైన కానుకను బహూకరించారు. శాలువాతో సత్కరించి, దుర్గాదేవి రూపం ముద్రించి ఉన్న శంఖాన్ని కూడా ఆమెకు అందజేశారు. మెగాస్టార్ నుంచి ప్రత్యేక బహుమతిని పొందే అదృష్టం తనకు దక్కటం పట్ల శ్రీలీల ఉబ్బితబ్బిబ్బవుతోంది.

ఈ ప్రత్యేక క్షణాలకు సంబంధించిన ఫొటోలను సామాజిక మాధ్యమాల వేదికగా అందరితో పంచుకుంది. ఇదిలా ఉండగా, ప్రపంచ మహిళా దినోత్సవాన్ని పురస్కరించుకొని ఇటీవల చిరంజీవి తనతో కలిసి పనిచేసిన మహిళా నటీమణులతో ప్రత్యేకంగా గౌరవించిన విషయం తెలిసిందే. ఇతర మహిళలకు సైతం తన సోషల్ మీడియా వేదిక ద్వారా శుభాకాంక్షలు తెలియజేశారు మెగాస్టార్.