‘కులగణన’పై బీసీ కమిషన్ సంప్రదింపులు

హైదరాబాద్, సెప్టెంబర్ 13(విజయక్రాంతి): తెలంగాణ బీసీ కమిషన్ చైర్మన్, కమిషన్ సభ్యులు శుక్రవారం పూర్వ కమిషన్ సభ్యులతో కులగణనపై సంప్రదింపులు జరిపారు. ఈ సందర్భంగా తాము గతంలో సేకరించిన సమాచారం వివరాలను పూర్వ కమిషన్ సభ్యులు వెల్లడించారు. జి.నిరంజన్ నేతృత్వంలోని కమిషన్‌కు విధాల సహాయసహకారాలు అందిస్తామని తెలిపారు. అలాగే తరుచుగా సమావేశమై పరస్పర చర్చలు జరుపుకోవాలని ఇరువురు నిర్ణయించారు. సమావేశంలో ప్రస్తుత కమిషన్ సభ్యులు రాపోలు జయప్రకాశ్, తిరుమలగిరి సురేందర్, శ్రీమతి బాలలక్ష్మి, పూర్వ బీసీ కమిషన్ చైైర్మన్ బి.ఎస్.రాములు, డాక్టర్ వకుళాభరణం కృష్ణ మోహన్ రావు, డాక్టర్ ఆంజనేయ గౌడ్ , జూలూరి గౌరీ శంకర్, సీహెచ్ ఉపేంద్ర, శుభప్రద్ పటేల్, కే.కిశోర్ గౌడ్ పాల్గొన్నారు.