న్యూఢిల్లీ: ప్రధాని షేక్ హసీనా రాజీనామా చేయాలని డిమాండ్ చేస్తూ పోలీసులకు, నిరసనకారులకు మధ్య జరిగిన హింసాత్మక ఘర్షణల్లో 90 మందికి పైగా మరణించిన నేపథ్యంలో బంగ్లాదేశ్‌కు వెళ్లవద్దని భారత్ తన పౌరులను కోరింది. బంగ్లాదేశ్‌లోని పరిణామాలపై భారత పౌరులకు కేంద్ర ప్రభుత్వం హెచ్చరికలు జారీ చేసింది. ఆ దేశానికి భారతీయులు ఎవరు వెళ్ళొద్దని కేంద్రం సీరియస్ వార్నింగ్ ఇచ్చింది. ప్రస్తుతం బంగ్లాదేశ్‌లో ఉన్న భారతీయ పౌరులందరూ చాలా జాగ్రత్తగా, అప్రమత్తంగా ఉండాలని కోరింది. సురక్షిత ప్రాంతాలకు పరిమితం కావాలని సూచించింది.

బంగ్లాదేశ్‌లో వివక్ష వ్యతిరేక విద్యార్థుల ఉద్యమం ఆదివారం సహాయ నిరాకరణ ఉద్యమాన్ని ప్రారంభించిన తర్వాత రాజధాని ఢాకా, బంగ్లాదేశ్‌లోని నగరాల్లో ఘర్షణలు జరిగాయి. 14 మంది పోలీసులతో సహా మొత్తం 97 మంది మరణించారు. వందలాది మంది గాయపడినట్లు సమాచారం. కొనసాగుతున్న పరిణామాల దృష్ట్యా, తదుపరి నోటీసు వచ్చేవరకు బంగ్లాదేశ్‌కు వెళ్లవద్దని విదేశీ వ్యవహారాల మంత్రిత్వ శాఖ తెలిపింది. ఢాకాలోని భారత హైకమిషన్‌తో అత్యవసర +8801958383679, +8801958383680, +8801937400591 ఫోన్ నంబర్‌ల ద్వారా సంప్రదించాలని తెలిపింది. 

: