పసికందు కిడ్నాప్.. 72 గంటల్లో కేసును చేదించిన పోలీసులు

హైదరాబాద్: లింగంపల్లి రైల్వే స్టేషన్ సమీపంలోని ఫుట్‌పాత్‌పై నిద్రిస్తున్న సర్కస్ బృందానికి చెందిన కుటుంబం నుండి తల్లి వద్ద ఉన్న ఒక నెల వయసున్న ఆడబిడ్డను అపహరించిన ఘటనలో అంతర్రాష్ట్ర బాలల అక్రమ రవాణా ముఠాను చందానగర్ పోలీసులు ఛేదించి ఆ చిన్నారిని రక్షించారు. పోలీసుల వివరాల ప్రకారం, కర్ణాటకలోని బీదర్ జిల్లా బల్కీ గ్రామానికి చెందిన 25 ఏళ్ల సర్కస్ ఉద్యోగిని, జూన్ 30న తెల్లవారుజామున లింగంపల్లి రైల్వే స్టేషన్ గోడ వెంబడి తన సర్కస్ బృంద సభ్యులతో కలిసి నిద్రిస్తుండగా ఈ ఘటన జరిగింది. 

తెల్లవారుజామున సుమారు 2 గంటల సమయంలో గుర్తుతెలియని వ్యక్తులు ఆటో-రిక్షాలో వచ్చి ఆమె నెల రోజుల కుమార్తెను బలవంతంగా లాక్కెళ్లారు. పాప ఏడుపు విని నిద్రలేచిన తల్లి ఆ వాహనాన్ని వెంబడించడానికి ప్రయత్నించినప్పటికీ, దానిని పట్టుకోలేకపోయింది. చందానగర్ పోలీస్ స్టేషన్‌లో భారతీయ న్యాయ సంహిత (BNS), జువెనైల్ జస్టిస్ చట్టం (బాలల న్యాయ చట్టం)లోని సెక్షన్ల కింద కేసు నమోదైంది. శిశువు ఆచూకీ కనుగొనేందుకు ఆర్‌సి పురం డివిజన్ ఏసిపి సిహెచ్ వై శ్రీనివాస్ ఆధ్వర్యంలో మూడు ప్రత్యేక బృందాలను ఏర్పాటు చేశారు. చందానగర్ ఇన్‌స్పెక్టర్ ఎస్ విజయ్, డిప్యూటీ ఇన్‌స్పెక్టర్లు సత్యనారాయణ, ఎన్ భాస్కర్‌ల నేతృత్వంలో ఈ బృందాలు మూడు రోజుల పాటు సైబరాబాద్, మల్కాజిగిరి, హైదరాబాద్‌లలోని సిసిటివి ఫుటేజీని పరిశీలించి, ఐదుగురు నిందితులను గుర్తించి అరెస్టు చేశాయి. శిశువును నగరం నుండి బయటకు తరలించేలోపే రక్షించాయమని పోలీసులు మీడియా సమావేశంలో వెల్లడించారు.