చెన్నై: కోయంబత్తూరు నుండి సేలం వెళ్తున్న ఒక ప్రభుత్వ బస్సు(TNSTC Bus) ఉత్తమశోలపురం సమీపంలోని అరియనూరు వద్ద ఘోర రోడ్డు ప్రమాదానికి గురైంది. ఈ ప్రమాదంలో ఎనిమిది మంది మరణించారు. తమిళనాడు రాష్ట్ర రవాణా సంస్థ (Tamil Nadu State Transport Corporation)కు చెందిన ఒక బస్సు అదుపు తప్పి, ఎదురుగా వస్తున్న వాహనాలను ఢీకొనడంతో ఈ దుర్ఘటన జరిగింది.

కోయంబత్తూరు నుండి సేలంకు 40 మందికి పైగా ప్రయాణికులతో వెళ్తున్న ఒక బస్సు, తన లేన్ నుండి పక్కకు తప్పుకుని, మధ్య విభజన రేఖను దాటి, ఎదురుగా వచ్చే వాహనాల లేన్‌లోకి దూసుకెళ్లింది. ఆ ప్రాంతంలోని సీసీటీవీ దృశ్యాల ప్రకారం, ఎదురు దిశ నుండి వస్తున్న ఒక టెంపో తరహా గూడ్స్ ఆటోను, ఒక ద్విచక్ర వాహనాన్ని ఆ బస్సు నేరుగా ఢీకొన్నట్లు కనిపిస్తోంది. టెంపో ఆటోలో 10 మందికి పైగా ప్రయాణిస్తున్నారు. వీరంతా ఒకే కుటుంబానికి చెందినవారని, ఒక కార్యక్రమం నుండి తిరిగి వస్తున్నారని అధికారులు తెలిపారు. మృతులను సెల్వరాజ్, మురుగన్, అముధ, మణికందన్, ఇరుసాయి, సత్య (మణికందన్ భార్య), ఐదేళ్ల నితీష,  11 నెలల జీవికగా గుర్తించారు. మరో ఇద్దరి పరిస్థితి విషమంగా ఉన్నట్లు వైద్యులు చెప్పారు. మరికొందరు గాయపడగా, చికిత్స నిమిత్తం సమీప ఆసుపత్రులకు తరలించారు.

బస్సులో ప్రయాణిస్తున్న ప్రయాణికులకు స్వల్ప గాయాలయ్యాయి. స్థానికుల సమాచారంతో ఘటనాస్థలికి చేరుకున్న పోలీసులు కేసు నమోదు చేసి దర్యాప్తు ప్రారంభించారు. అతివేగం వల్ల డ్రైవర్ నియంత్రణ కోల్పోయాడా, యాంత్రిక లోపం వల్లనా అనే అంశాలపై ప్రాథమిక విచారణ జరుగుతోందని పోలీసులు చెప్పారు. ఈ ఘటనపై స్పందిస్తూ, ఏఐఏడీఎంకే(AIADMK) ప్రధాన కార్యదర్శి ఎడప్పాడి కె. పళనిస్వామి ప్రాణనష్టం పట్ల విచారం వ్యక్తం చేశారు.