మైసిగండిలో ఘనంగా ‘తీజ్’ వేడుకలు

కడ్తల్, అగస్టు 25(విజయక్రాంతి):  ​కడ్తాల్ మండలం మైసిగండి గ్రామంలో ‘తీజ్’ వేడుకలు అత్యంత వైభవంగా జరిగాయి. ఈ కార్యక్రమానికి ముఖ్యఅతిథిగా ఎమ్మెల్యే కశిరెడ్డి నారాయణరెడ్డి, టీపీసీసీ నేత బాలాజీ సింగ్ పాల్గొనగా, పలువురు ప్రజాప్రతినిధులు, కాంగ్రెస్ నాయకులు హాజరయ్యారు.

​ఈ సందర్భంగా ఎమ్మెల్యే కశిరెడ్డి నారాయణరెడ్డి మాట్లాడుతూ... తీజ్ వేడుకలు ప్రకృతిని ఆరాధించే విశిష్టమైన పండుగని అన్నారు. గిరిజనులు అత్యంత సంప్రదాయబద్ధంగా ఈ ఉత్సవాలను నిర్వహించడం అభినందనీయమని, ఇలాంటి పండుగలు మన సంస్కృతి సంప్రదాయాలను, మూలాలను కాపాడతాయని ఆయన పేర్కొన్నారు.​ వేడుకల్లో భాగంగా గిరిజన మహిళలు, యువతులు ధాన్యపు మొలకల బుట్టలను నెత్తిపై ధరించి ఊరేగింపుగా తరలివచ్చారు. సంప్రదాయ దుస్తుల్లో వారు చేసిన జానపద నృత్యాలు అందరినీ విశేషంగా ఆకట్టుకున్నాయి. అనంతరం ఆ మొలకల బుట్టలను స్థానిక చెరువులో భక్తిశ్రద్ధలతో నిమజ్జనం చేయడంతో వేడుకలు ముగిశాయి.