కాళేశ్వరంలో భారీ వర్షం

1. నేలకొరిగిన చెట్లు, పంటలకు నష్టం
   

భక్తులకు తీవ్ర ఇబ్బందులు

కాళేశ్వరం, ఫిబ్రవరి 23 (విజయక్రాంతి): మహాదేవపూర్ మండలం పరిధిలోని కాళేశ్వరం గ్రామంలో సోమవారం భారీ వర్షం కురిసింది. ఈదురు గాలులతో కూడిన వర్షం కారణంగా గ్రామంలోని ప్రధాన రహదారులు నీటమునిగాయి. పలు లోతట్టు ప్రాంతాల్లో ఇళ్లలోకి వర్షపు నీరు చేరడంతో ప్రజలు తీవ్ర ఇబ్బందులు ఎదుర్కొన్నారు. గాలుల ధాటికి అనేక చోట్ల చెట్లు నేలకొరిగాయి. కొన్ని ప్రాంతాల్లో విద్యుత్ సరఫరా నిలిచిపోవడంతో గ్రామస్తులు చీకటిలో గడపాల్సి వచ్చింది. కొన్ని ఇండ్ల కు రేకులు పూర్తి గా ఎగిరి పోయాయి. వర్ష ప్రభావంతో పత్తి, మిర్చి, మొక్క జొన్న పంటలు దెబ్బతినడంతో రైతులు ఆవేదన వ్యక్తం చేస్తున్నారు.

ఎక్కడ చూసినా పంటలు నీటమునిగి, చెట్లు నేలకొరిగిన దృశ్యాలు కనిపిస్తున్నాయి. అలాగే కాళేశ్వరం దర్శనానికి వచ్చిన భక్తులకు కూడా తీవ్ర ఇబ్బందులు ఎదురయ్యాయి. ఆలయం పరిసర ప్రాంతాల్లో చెట్లు విరిగిపడడంతో పాటు చెదారం చేరి అవస్థలు కలిగించాయి. ఆలయం చుట్టూ చెత్త పేరుకుపోవడంతో భక్తులు ఇబ్బందులు పడ్డారు. అధికారులు వెంటనే స్పందించి పరిస్థితిని చక్కదిద్దడంతో పాటు నష్టం అంచనా వేసి బాధిత రైతులు, ప్రజలను ఆదుకోవాలని స్థానికులు కోరుతున్నారు.