ఇటీవల బెంగళూరు రేవ్ పార్టీ కేసులో పోలీసులు నటి హేమను అరెస్టు చేసిన విషయం తెలిసిందే. దీంతో మూవీ ఆర్టిస్ట్స్ అసోసియేషన్ (మా) నుంచి సస్పెండ్ చేసినట్టు ‘మా’ ప్రకటించింది. ఈ అంశంపై హేమ ఓ బహిరంగ లేఖ విడుదల చేశారు. దాన్ని మా అధ్యక్షుడు మంచు విష్ణుకు సోమవారం అందజేశారు హేమ. తాను నిర్దోషినని ఆ లేఖలో పేర్కొన్నారామె. ‘మీడియా నాపై నిరాధారమైన ఆరోపణలు చేసిన నేపథ్యంలో దేశంలోనే అత్యున్నత ప్రమాణాలున్న ల్యాబ్‌లో నేను పరీక్షలు చేయించుకున్నా.

వాటిలో నేను డ్రగ్స్ తీసుకోలేదని స్పష్టమైంది. త్వరలో పోలీసులు చేసిన పరీక్షల్లోనూ ఇవే రిజల్ట్స్ వస్తాయని నాకు నమ్మకం ఉంది. ఈలోపే మా సభ్యత్వం రద్దు చేయడం సరైంది కాదని నేను భావిస్తున్నా. కొన్ని రోజులుగా జరుగుతున్న ప్రచారంతో నేను తీవ్ర మానసిక క్షోభకు గురవుతున్నా. నాకు అండగా ఉండాలని కోరుకుంటూ సస్పెన్షన్ ఎత్తివేస్తారని ఆశిస్తున్నా’ అని పేర్కొన్నారు.