ఏనాటికి నీ దరి చేరేనో!

నీ చిటికెన వేలు పట్టి దారంటా నడుస్తా ఉంటే నాకంటే నవాబు ఇంకెవరూ లేరనిపించేది వంట చేస్తూ నువ్వు  ‘జాజి మొగ్గల జాజి..’ అని పాడుతుంటే నాకు లాలిపడుతున్నట్లుండేది సంకురాతిరి రేతిరి నువ్వు వాకిట ముగ్గేస్తుంటే తెల్లటి సింగడి ఇంటిముంగట విరిసేది సలి గాడ్పు తగిలి  నేను వణికిపోతుంటే నే చేతి స్పర్శే నాకు వెచ్చదనం జ్వరమొచ్చినప్పుడు నువ్వు ఎల్లిపాయ కారం చేస్తే ప్రాణం జివ్వున లేచొచ్చేది ఉడుకుడుకు అన్నంలా ఆబగా కలుపుకుని తింటుంటే కళ్లెమ్మట చెమ్మ ఎదను తాకేది రెక్కలొచ్చిన పక్షిలా  సముద్రాలు దాటి నేను ఎగిరిపోతే ఇంటివద్ద దిక్కులేని పక్షిలా నువ్వు నీకు నాకు సప్త సముద్రాల దూరం అమ్మ గావురం కావాలనే ఆశలో నేను బండెడు బాధ్యతలు ఎత్తుకుని నీ తీరం చేరే నావలా నా పయనం ఏ నాటికి నీ దరిచేరేనో!