ఇండియన్ ఆడిట్, అకౌంట్స్ సర్వీస్ అధికారి అఖిల్

వెంకటాపూర్,(విజయక్రాంతి): మండలంలోని యునెస్కో ప్రపంచ వారసత్వ కట్టడంగా గుర్తింపు పొందిన ప్రసిద్ధ రామప్ప దేవాలయాన్ని ఇండియన్ ఆడిట్ అండ్ అకౌంట్స్ సర్వీస్ అధికారి అఖిల్ సందర్శించారు. ఈ సందర్భంగా ఆలయ అర్చకులు వారికి కుంభ స్వాగతం పలికి ప్రత్యేక పూజలు చేసి స్వామివారి తీర్థప్రసాదాలు అందించారు. కాకతీయుల కాలంలో నిర్మితమైన ఈ అద్భుత శిల్పకళా సౌందర్యాన్ని ఆయన ఆసక్తిగా తిలకించారు.

ఈ సందర్భంగా ఆలయ నిర్మాణ శైలి, శిల్పాల నైపుణ్యం, దేవాలయ గర్భగృహం, స్తంభాలపై చెక్కిన సున్నితమైన శిల్పాలు, నర్తకీ మణులు, శబ్ద స్తంభాలు వంటి విశేషాలను టూరిజం గైడ్ తాడబోయిన వెంకటేష్ విపులంగా వివరించారు. రామప్ప దేవాలయం ఎందుకు ప్రపంచ ఖ్యాతిని పొందిందో, కాకతీయుల వాస్తు శాస్త్ర ప్రతిభ ఏ స్థాయిలో ఉందో తన వివరణ ద్వారా తెలియజేశారు. పర్యటన మొత్తం సమయంలో టూరిస్టు పోలీసులు అరుణ్ కుమార్, శ్రీనివాస్ భద్రతా ఏర్పాట్లతో పాటు పర్యాటక నిర్వహణను సమర్థవంతంగా పర్యవేక్షించారు. రామప్ప దేవాలయాన్ని ప్రత్యక్షంగా వీక్షించిన అఖిల్, ఆలయ శిల్పకళ అద్భుతమని, భారతీయ సాంస్కృతిక వారసత్వానికి ఇది ప్రతీకగా నిలుస్తుందని ప్రశంసలు వ్యక్తం చేశారు.