పల్లె తల్లుల చలువే !

పల్లె తల్లుల రొమ్ముతాగి

ఎదిగిన పసి పిల్లలు

పల్లెల చెమటచుక్కలతో పోగేసిన 

సంపదల సరస్సులో

తుళ్లుతూ ఎగురుతున్న చేపపిల్లలు

పల్లెలు చొక్కా లేకుండా తిరగటంవల్లే

నగరాలు ప్యాంటూ షర్టేసుకుని కులుకుతున్నాయి

దేశ దేహంనిండా

నగరాలు నరాలై తేలుతోంది

పల్లెల చెమట రక్తమై ప్రవహించటం వల్లే

కొమ్మల్లా విస్తరించిన నగరాలకు

బలాన్ని సమకూర్చిన చెట్టు వేర్లు పల్లెలే 

ఇవాళ నగరాలు 

చెట్టంత ఎదిగిన కొడుకులయ్యాయంటే

పెంచి పెద్ద చేసిన పల్లెతల్లుల చలువే

మూలాలు మరచిపోతే పుట్టగతులుండవు

పునాదుల్ని కూల్చుకుంటే

లేచిన మేడలు నిలబడవు

వృద్ధాప్యంతో శిథిలమవుతున్న పల్లెతల్లుల్ని

ఎదిగిన కొడుకుల్లా దగ్గరికి 

తీసుకోవాల్సింది నగరాలే !

 చిత్తలూరి